InfoHub Logo

Taldykorgandaǵy jeke úıdiń jarylysy men órtke qatysty sot úkimi shyqty. Gaz kompanıasynyń 51 jastaǵy basshysy kináli dep tanylyp, 4 jylǵa bas bostandyǵynan aıyryldy. Bul týraly Tengrinews.kz habarlaıdy.

Oqıǵa 2024 jyldyń 31 jeltoqsanynda bolǵan. Bekpaevtar otbasynyń úıinde bolǵan jarylys saldarynan jeti adam aýrýhanaǵa jetkizilgen. Ókinishke oraı, úsheýi dárigerlerdiń barlyq kúshine qaramastan kóz jumdy.

Tergeý barysynda apatqa úıdiń janynan ótetin gaz qubyrlarynan tabıǵı gazdyń shyǵýy sebep bolǵany anyqtaldy. Osyǵan baılanysty Qylmystyq kodekstiń 306-baby, 3-bóligi boıynsha qylmystyq is qozǵaldy. İske jergilikti gaz kompanıalarynyń biriniń 51 jastaǵy ıesi tartylyp, keıinnen qamaýǵa alyndy.

Sot otyrystarynda is materıaldary 14 tomnan turdy. Búgin sýdıa Almas Bekbosynov úkimdi oqyp berdi. Sottalýshy kináli dep tanylyp, 4 jylǵa bas bostandyǵynan aıyryldy. Ol jazasyn mınımaldy qaýipsizdigi bar mekemede óteıtin bolady. Úkim áli zańdy kúshine engen joq.

Eske sala keteıik, 2024 jyldyń 31 jeltoqsanynda Taldykorgannyń shetindegi eki qabatty jeke úıde jarylys bolyp, órt shyqty. Jeti adam, sonyń ishinde balalar aýyr jaraqat aldy. Úsh adam qaza tapty. Bul oqıǵa qoǵamda úlken rezonans týdyryp, halyq bılikten tergeýdi erekshe baqylaýǵa alýdy talap etken bolatyn.