Sekildi ómir qysqa, jarty tutam,
Nadandar dep oılap júr ómirdi utam.
Az ómirdi aqyndyq jolǵa berdim,
Lepes qyp túkirgen soń molda Muqan,
Qalamdy shyn berilip, aldym berik,
Álde qandaı bir kúshke kóńil senip,
Buryn jalǵyz oqý edi izdegenim,
Endi oǵan óleń jazý bolsyn serik.
Birdeı me sabaq bergen barlyq molda,
Ant berem, alýan túrli deımin olla.
Deneden-aq kórinip turǵan joq pa,
Saýsaqtyń alalyǵy bitken qolǵa.
Ákemnen «Álip-bıdi» úıde oqydym,
Úırenip namaz sabaq jat toqydym,
Áli molda aldynda dál eki jyl
Ártúrli eski kitapty bir shoqydym.
Tortaıdan eki jyldaı sabaq aldym,
Ol baıǵus aıaǵan joq oıda baryn.
Ǵylymnyń orny bas pen kókirekte,
Búıir shyǵyp, qampıa toımas qaryn.
Muqannan ekinshi jyl sabaq alam,
Uıyqtasam da kóńilim oqýǵa alań.
Lepes qyp ózi bastap, «aqyn bol» dep,
Duǵasyn yqylaspen berdi maǵan.
Sondyqtan bir maqsatym óleń jazý,
Oqýmenen birge izdep, qosa qazý.
Osy oıyma ótken tún sert berildi,
Mende bolmas bul oıdan ómirde azý.

---