InfoHub Logo

Semeı qalasynyń №2 sotynda turaqty tirkeýsiz balany bilim ordasyna qabyldaǵany úshin para almaq bolǵan mektep dırektoryna qatysty úkim shyqty, Semeı qalasynyń №2 sotyn baspasóz qyzmeti dep habarlaıdy .

Dırektorǵa qatysty sot isi búgin sońyna jetti. Sot materıaldaryna sáıkes, qaladaǵy №7 orta mekteptiń dırektoryna semeılik turǵyn ótinish bildirip, óziniń tanysynyń balalalaryn turaqty tirkeýsiz mektepke qabyldaýdy suraǵan. Bilim ordasynyń basshysy oqýshylardy qabyldaıtynyn, alaıda bul qyzmettiń tegin bolmaıtynyn eskertken.  Ótinish bildirýshilerden aldymen kóliktiń dóńgelegin suraǵan. Alaıda az ýaqyt ótkennen keıin dırektor quny 63 500 teńgelik vıdeotirkeýish satyp alyp berýdi buıyrǵan. Naqty qylmys barysynda, ıaǵnı parany alý kezinde mektep basshysyn sybaılas jemqorlyqqa qarsy agenttik qyzmetkerleri qolǵa túsirdi.

Mektep dırektory Qylmystyq kodekstiń 366-baby 1-bóligi boıynsha jaýap berýine týra keldi. Sot úkimi boıynsha, 63 500 teńgelik «syılyq» elý eselenip, dırektorǵa 3 mıllıon 170 myń teńge kóleminde aıyppul salyndy. Sonymen birge, sottalýshynyń múlki tárkilenip, ol ómir boıy memlekettik qyzmette eńbek etý quqyǵynan aıyryldy.

---