InfoHub Logo

Sıdneı Olımpıadasynyń kúmis júldegeri, erkin kúres sheberi Islam Baıramýkov mánerlep syrǵanaýshy Mıhaıl Shaıdorovtyń jalaqysyna qatysty týyndaǵan jaǵdaıǵa pikir bildirdi.

Bul týraly Infohub.kz aqparat agenttigi habarlaıdy.

Baıramýkovtyń aıtýynsha, Shaıdorovtyń jetistigi – Qazaqstan sporty úshin úlken oqıǵa. Ol sportshynyń álemdik deńgeıde jeńiske jetip, elge 32 jyldan keıin altyn medal syılaǵanyn atap ótti. «Bul – úlken eńbektiń nátıjesi. Búkil halyq osy jeńiske qýandy, bolashaǵynan zor úmit kútedi. Mıhaıl Qazaqstan sportynyń mártebesin kóterdi. Alaıda qazir osy másele tóńireginde ártúrli pikir aıtylyp jatyr», – dedi ol.

Sporttaǵy qarjylandyrý máselesi

Olımpıada júldegeri bul jaǵdaıǵa sport salasynda uzaq jyl eńbek etken maman retinde qaraıtynyn jetkizdi. Onyń pikirinshe, máseleni úlken daýǵa aınaldyrmaı, ózara kelisim arqyly sheshýge bolady. «Tártip bar jerde ǵana júıe jumys isteıdi. Sondyqtan munda asa kúrdeli másele kórip turǵan joqpyn. Muny sabyrmen otyryp sheshýge bolady», – dedi Baıramýkov.

Ol sporttaǵy qarjylandyrý máselesine de toqtaldy. Aıtýynsha, sportshylarǵa beriletin memlekettik syıaqylar men tólemder salyq tóleýshilerdiń qarajaty esebinen bólinedi. «Sportshylar jeńispen oralǵanda olarǵa qurmet kórsetemiz. Biraq bólinetin qarjynyń bári halyqtyń qarajaty ekenin umytpaý kerek. Eger qarjy baqylaýsyz taratylsa, keıin onyń jumsalýyna qatysty suraqtar týyndaıdy», – dedi ol.

Mınıstrlik jumysy men jas býyn

Baıramýkov Qazaqstan sporty damyp kele jatqanyn aıtyp, Týrızm jáne sport mınıstrliginiń jumysyn oń baǵalady. «Ár kezeńniń, ár mınıstrdiń óz ereksheligi bar. Qazirgi mınıstrdiń tusynda sportshylarǵa kóptegen múmkindik jasaldy», – dedi ol.

Sonymen qatar ol burynǵy sportshylardyń salada qyzmet etýin qoldaıtynyn jetkizdi. Onyń aıtýynsha, tájirıbeli mamandardyń bilimi men joly jas býyn úshin qajet.

Qoǵamǵa shaqyrtý

Sóz sońynda Islam Baıramýkov qoǵamdy bul máseleni ýshyqtyrmaı, syndarly jolmen sheshýge shaqyrdy. «Bul jaǵdaıdy saıasılandyrýdyń qajeti joq. El birligin saqtap, sportshylardy qoldaýymyz kerek. Barlyǵy zań aıasynda durys sheshiledi dep senemin», – dedi ol.

Bas bapkerdiń pikiri

Buǵan deıin Qazaqstannyń frıstaıl-mogýl quramasynyń bas bapkeri Elena Krýglyhına da Shaıdorovtyń jalaqy máselesine qatysty pikir bildirgen edi. Onyń aıtýynsha, qysqy sport túrleriniń ókilderi sıaqty Mıhaıl Shaıdorov ta 2026 jyldyń 22 aqpanyna deıingi kelisimshartqa qol qoıǵan.

Krýglyhına qujattardy ýaqytyly rásimdeýge tek federasıa ǵana emes, sportshynyń menedjerleri men agentteri de jaýapty bolǵanyn aıtty. «Mısha, álde bireýler seni paıdalanyp júr me? Sen de, biz de 2026 jyldyń 22 aqpanyna deıingi kelisimshartpen jumys istedik. Federasıa kelisimdi ýaqytynda uzartpaǵany ras. Biraq seniń de agentteriń men menedjerleriń bar ǵoı. Nege bul máselemen aınalyspady?» – dep jazdy ol áleýmettik jelide.