InfoHub Logo

Sattar men Toqtar - áskerde birge bolǵan jigitter. Sattar úılendi. Úılengenine de asa kóp ýaqyt bola qoımaǵan edi, bir kúni Sattardyń úıine janynda Ábý degen joldasy bar Toqtardyń kirip kelgeni. Áskerde birge bolǵan eki jigit lezde qushaqtary aıqasyp, birin-biri arqadan qaǵysty da qaldy. Toqtar janyndaǵy Ábýdi Sattarǵa tanystyrdy. Sattar onymen de emen-jarqyn amandasyp, tanysyp qoıdy. Endi Sattar óziniń kelinshegine Toqtardyń kim ekendigin, óziniń ómirinde qandaı orny bar ekendigin aıtyp jatty. Qonaq jigitterdiń kelýimen birge úıdiń ishine
bir kóńildi dabyr ornady.

Sattardyń kelinshegi pysyq-aq jan edi. Kúıeýiniń joldastary kelip qalǵasyn, bir bólmege jyldamdatyp dastarqanyn daıyndaı qoıdy, as ta ázirlenip keldi, dastarqannyń shetinen samaýryn da oryn aldy. Sol-aq eken, áńgime qyzyp sala bersin. Áńgime áýeli eki adamnyń arasynda - áskerde birge bolǵan Sattar men Toqtardyń arasynda bastaldy da, sálden keıin olardyń áńgimesine Sattardyń kelinshegi de emen-jarqyn peıilmen aralasyp ketti. Al Ábý kóbine tyńdaýshy bolyp, jigitterdiń áńgimesine oqta-tekte bir atsalysyp otyrdy. Osylaı bastalyp ketken áńgime otqa tamyzyq tastaǵandaı laýlaı túspese, bir báseńdegen joq. Birazdan soń shaı da óz máresine jete bastady. Áńgimeniń tizgini osy kezde baryp qana sál-pál tartyla bastaǵan edi. Endi Sattardyń kelinshegi úı ıesine tán qonaqjaılylyq peıilmen:

- Jigitter, shaı alsańdarshy. Qane, taǵy da shaı ishińder. Toqtar, keseńdi ber, shaı quıaıyn, - dedi.

Bul kezde Toqtar kesesin tóńkergen edi.

- Oı, joq, biraz ishtim shaıdy. Áńgimemen otyryp shaıdy da biraz aldyryp tastappyz ǵoı, - dedi ashyq-jarqyn minezdi Toqtar.

Sattardyń kelinshegi endi Ábýge buryldy:

- Ábý, qane, ákel keseńdi, shaı quıaıyn.

Biraq Ábýdiń aldynda kese joq edi. Sóıtse, Ábýge múlde shaı da quıylmaǵan eken. Muny kórip dastarqan basyndaǵylar "Aý, áńgimemen otyryp Ábýge múlde shaı da quımappyz ǵoı" dep dýyldasyp kúlip jiberdi.

- Qap, - deıdi Toqtar. - joldasymnyń kesesi joǵyn meniń de baıqamaǵanym-aı. Óziń nege aıtpadyń shaı quı dep.

Sóıtse, Ábý:

- Oı, joq, ózim shaı ishpeıtin edim, - degeni.

Bul sózge úı ishindegiler taǵy da dýyldasyp kúldi.

"Áńgime buzaý emizer, buzaý taıaq jegizer". Bul jerde taıaq jeı qoıǵan eshkim joq, árıne. Sonda da úıge bas suqqan eki qonaq jigittiń biriniń sonshama bir samaýryn shaıdan bir kese de shaı ishpegen kúıi attanyp ketkeni qyzyq boldy.

---