InfoHub Logo

Sherzat Polattyń qazasyna qatysty qoǵam nazaryn aýdarǵan qylmystyq is boıynsha sot prosesi sheshýshi kezeńge jetti. Prokýrorlar negizgi aıypty retinde Abzal Shynasyldy tanyp, oǵan 23 jylǵa bas bostandyǵynan aıyrý jazasyn surady. Al ózge aıyptalýshylarǵa 20 jyldan 1,5 jylǵa deıingi túrli merzimde jaza talap etildi.

Prokýratýra: qylmys toptyq sıpatta emes
Memlekettik aıyptaýshy Dana Sársenbaı bul isti tok-shoýǵa aınaldyrmaýǵa shaqyryp, qylmystyń jeke dara jasalǵanyn alǵa tartty. Ol ár azamat jeke is-áreketine ǵana jaýap berýi tıis ekenin qadap aıtty.

Marqumnyń otbasy — qatań jaza talap etýde
Sherzattyń týystary sottan qatysy bar barlyq azamattardy qatal jazaǵa tartýdy surap otyr. Anasy Shynasyldy ómir boıyna bas bostandyǵynan aıyrýdy talap etti. Aıta keteıik, kámeletke tolmaǵan Dýman Ysqaqty marqumnyń jaqyndary keshiretinin málimdegen. Prokýratýra oǵan 1 jyl 6 aı túrme jazasyn suraǵan.

Advokat málimdemesi: bar kiná – marqumnyń ózinde
Sotta kútpegen málimdeme jasaǵan Abzal Shynasyldyń advokaty Jumat Ábenov oqıǵanyń negizgi sebebi retinde marqum Sherzattyń «tárbıesizdigin» atady.

«Janjal araq-sharaptan bastaldy. Biraq janjaldy ýshyqtyrǵan — Sherzat. Ol aldymen Áskentaıdy uryp, onyń murnyn qanatqan. Sherzattyń ákesi de sol jerde boldy, biraq eshteńe istemedi», — dedi qorǵaýshy.

Onyń aıtýynsha, pyshaq jaraqatyn naqty kim salǵany belgisiz. Sol sebepti, Shynasyldy "kisi óltirý" babymen emes, "buzaqylyqpen" jaýapqa tartý kerek deıdi.

«Shynasyl kinásin moıyndady degenge ǵana súıenip, aıyp taǵylyp otyr. Biraq naqty dálel joq. Tipti marqumnyń ákesi de qoǵamdyq tártipti buzyp, tún ortasynda pyshaqpen kóshege shyqqan», — dedi Ábenov.

Sot sheshimi jaqyn arada shyǵýy tıis. Bul is — tek sot prosesi emes, qoǵamdaǵy jastar tárbıesi, zań ústemdigi jáne ádildik týraly keńirek oı týdyryp otyr.