InfoHub Logo

Aqmola oblysynyń Shýchınsk qalasyndaǵy kafede bolǵan jarylystan keıin qala bıligi zardap shekkender men qaza tapqandardyń otbasylaryna jan-jaqty qoldaý kórsetýdi bastady. Oqıǵanyń mán-jaıyn anyqtaý jáne qaýipsizdik sharalaryn kúsheıtý jumystary júrgizilýde.

Bul týraly Infohub.kz aqparat agenttigi habarlaıdy.

Jedel shtab otyrysy

Oblys ákimi Marat Ahmetjanov zardap shekkender men qaza tapqandardyń otbasylaryna jan-jaqty kómek kórsetýdi, medısınalyq kómekti ýaqtyly uıymdastyrýdy jáne jedel járdem brıgadalarynyń táýlik boıy kezekshiligin qamtamasyz etýdi tapsyrdy. Sondaı-aq, oqıǵanyń sebepterin obektıvti tergep, kinálilerdi jaýapqa tartý jáne qaýipsizdik talaptarynyń saqtalýyn kúsheıtý mindetteldi.

«Azamattardyń qaýipsizdigi basty nazarda bolýy tıis. Bul baǵytta qosymsha uıymdastyrýshylyq jáne aldyn alý sharalary qabyldanady. Zardap shekken otbasylarǵa tolyq qoldaý kórsetemiz», - dedi oblys ákimi.

Qarjylaı jáne áleýmettik kómek

Qazirgi tańda qaza tapqandardyń 6 otbasy 2 mıllıon teńgeden birjolǵy tólem aldy. Kafe ıesi de qaza tapqandardyń otbasylaryna taǵy 2 mıllıon teńgeden tóledi. Sondaı-aq, demeýshilik qarajat esebinen 5 otbasynyń nesıeleri ótelip, zańnamaǵa sáıkes áleýmettik tólemder taǵaıyndaldy.

Vedomstvoaralyq komısıa jumysy

QR Tótenshe jaǵdaılar mınıstrliginiń basshylyǵymen aýdan aýmaǵynda vedomstvoaralyq komısıa jumysyn jalǵastyrýda. Mınıstr aýdandyq aýrýhanada em alyp jatqan naýqastarmen kezdesip, jaǵdaılarymen tanysty. Barlyq naýqastarǵa qajetti medısınalyq kómek tolyq kólemde kórsetilip, jaǵdaılary dárigerlerdiń baqylaýynda.

Oqıǵanyń mán-jaıy

26 aqpanda Shýchınsk qalasynda «Ortalyq plov» meıramhanasynda gaz-aýa qospasynyń jarylysy boldy. Oqıǵa saldarynan 28 adam zardap shegip, 7 adam qaza tapty. Zardap shekkender Býrabaı aýdandyq aýrýhanasyna jáne Kókshetaý qalalyq kópbeıindi aýrýhanasyna jetkizildi.