InfoHub Logo

Shymkentte 18 jastaǵy stýdent qyz áleýmettik jelidegi jalǵan jumys jarnamasyna aldanyp, zorlyq-zombylyqqa ushyraǵanyn aıtyp, polısıaǵa aryzdandy. Qyzdyń týystary bul iske uıymdastyrýshylardy da jaýapqa tartýdy talap etip otyr.

Bul týraly Infohub.kz aqparat agenttigi habarlaıdy.

Jumysqa shaqyryp, zorlyq jasaǵan

Jábirlenýshiniń aıtýynsha, ol áleýmettik jelide jarıalanǵan jalaqysy joǵary jumys týraly habarlandyrýǵa senip, kórsetilgen mekenjaıǵa barǵan. Alaıda, bul jer «bodı-massaj» qyzmetin kórsetetin ortalyq bolyp shyqqan. Ol anonım suhbatynda oqıǵanyń byltyr jazda bolǵanyn aıtyp, sol jerden óz erkimen kete almaǵanyn jetkizdi.

Qyzdy kúshtep ishke kirgizip, shyǵarmaı ustaǵan. Esik aldynda kúzetshiler turǵanyn, al ishindegiler oǵan eshkim tıispeıtinin, tek massaj jasaý kerektigin aıtyp sendirgen. Alaıda, jaǵdaı onyń oılaǵanynan múldem basqasha bolyp shyqqan.

«İsti toqtatpasańdar, óltiremiz»

Jábirlenýshiniń týystary bul ǵımarattyń áli kúnge deıin monsha retinde jumys istep turǵanyna narazy. Olar quzyrly organdardyń áli kúnge deıin naqty shara qoldanbaǵanyn aıtyp, ózderine birneshe ret qoqan-loqy jasalǵanyn málimdedi. «İsti toqtatpasańdar, senderdi óltiremiz» dep qorqytqandaryna shaǵymdandy.

Polısıa tergeý júrgizip jatyr

Shymkent qalalyq polısıa departamenti bul derek boıynsha Qylmystyq kodekstiń 120-baby 1-bóligi («Zorlaý») boıynsha sotqa deıingi tergeý bastalǵanyn habarlady. Qazirgi tańda sot-psıhologıalyq-krımınalıstıkalyq saraptama taǵaıyndalyp, jábirlenýshiniń uıaly telefonyna da zertteý júrgizilýde. Saraptama qorytyndylary alynǵannan keıin qylmystyq is boıynsha túpkilikti sheshim qabyldanady.

Jábirlenýshiniń otbasy tek kúsh kórsetken adamdy ǵana emes, qyzdy aldap osy ortaǵa tartqan uıymdastyrýshylardy da jaýapqa tartýdy talap etip, istiń tezdetilip sotqa jetýin surap otyr.