InfoHub Logo

Shymkentte Badam ózeniniń boıyndaǵy quny 2,7 mıllıard teńgege baǵalanǵan bógettiń bir bóligi beımálim adamdardyń áreketinen qırap qaldy. Jaǵalaýdy bekitý jumystary aıaqtalǵanyna birneshe aı ǵana bolǵanda, 40 metrdeı beton qurylymy zaqymdaldy.

Bul týraly Infohub.kz aqparat agenttigi habarlaıdy.

Bógettiń búliný sebebi

Shymkent qalasynyń jaıly qalalyq ortany damytý basqarmasynyń málimetinshe, belgisiz tulǵalar ózen arnasynan tikeleı tas óndirýmen aınalysqan. Osy áreketteri saldarynan gıdrotehnıkalyq qurylys zaqymdalǵan.

Nátıjesinde, shamamen 40 metrdeı beton bógetke nuqsan keldi. Quqyq qorǵaý organdary kinálilerdi anyqtaý jumystaryn júrgizip jatyr.

Vedomstvonyń habarlaýynsha, ózendegi jaǵdaı turaqty. Qazirgi ýaqytta jaqyn mańdaǵy aýmaqtardy sý basý qaýpi joq.

2,7 mıllıard teńgelik joba

Jaǵalaýdy bekitý jumystary ótken jyldyń jeltoqsan aıynda aıaqtalǵan bolatyn. Badam ózeniniń boıynda 5,3 shaqyrym jaǵalaý syzyǵy bekitildi.

Igilik, Jańatalap jáne Kókbulaq eldi mekenderinde mamandar ózen arnasyn tegistep, eńisterdi betonmen qaptap, gıdrotehnıkalyq qurylystardy nyǵaıtty.

Jobany iske asyrýǵa búdjetten 2,7 mıllıard teńge bólingen edi. Jańartylǵan bógettiń sý tasqyny qaýpin azaıtatyny kútilgen bolatyn.

Búlingen ýchaskesin merdiger uıym óz esebinen qalpyna keltiredi. Nysan jeti jyldyq kepildik merziminde.