
- 03 sáý. 2025 09:20
- 39
Shymkentte mas kúıdegi jasóspirimder poıyz vagonyna minýge umtyldy
Shymkent temirjol vokzalynda úsh jasóspirimniń ómirge qaýipti áreketi tirkeldi. Olar mas kúıinde «Atyraý – Almaty» baǵytyndaǵy №42 jolaýshylar poıyzy júre bastaǵanda, sońǵy vagonǵa jarmasyp minýge tyrysqan.
Vokzal kezekshisi Meıirbek Kerimbekov bul jaǵdaıdy der kezinde baıqap, stansıa qyzmetkerleri men jelilik polısıaǵa habar berdi. Temirjolshylar men quqyq qorǵaý organdarynyń jedel áreketiniń arqasynda jasóspirimder ustalyp, polısıa bólimshesine jetkizildi. Qazir olardyń jeke tulǵalary anyqtalyp, oqıǵanyń mán-jaıy zerttelýde.
Oqıǵa saldarynan poıyz bes mınýtqa keshigip, qozǵalysyn saǵat 01:28-de qaıta jalǵastyrdy.
Temirjol kóligine syrtynan jarmasý, ásirese mas kúıde, adam ómirine asa qaýipti ekenin este saqtaý mańyzdy. «Jolaýshylar tasymaly» AQ azamattardy qaýipsizdik erejelerin qatań saqtaýǵa shaqyrady. Jolaýshylar tek arnaıy jabdyqtalǵan platformalardan ǵana poıyzǵa minýi tıis, al tehnıkalyq aıaldamalar kezinde vagonnan shyǵýǵa tyıym salynǵan.
Temirjol qyzmetkerleri ata-analardan balalarymen qaýipsizdik sharalaryn talqylaýdy suraıdy. Eger qandaı da bir quqyqbuzýshylyq baıqalsa, dereý temirjol qyzmetkerlerine nemese polısıaǵa habarlaý qajet.