InfoHub Logo

Shymkent qalasyndaǵy M.Áýezov atyndaǵy Ońtústik Qazaqstan ýnıversıtetinde asa iri kólemde búdjet qarajatyn jymqyrý jáne qylmystyq jolmen alynǵan múlikti zańdastyrý faktisi boıynsha tergeý aıaqtaldy. Bul týraly Qarjylyq monıtorıń agenttiginiń Shymkent qalasy boıynsha departamenti málimdedi.

Tergeý málimetinshe, kúdiktiler qatarynda ýnıversıtet rektorynyń mindetin atqarýshy, qarjy jáne ákimshilik departamentteriniń dırektorlary men birqatar merdiger uıym basshylary bar.

Ýnıversıtet pen merdiger kompanıalar arasynda jalpy somasy 256 mıllıon teńgege jalǵan kelisimsharttar jasalyp, qurylys-montaj jumystary men túrli qyzmetter kórsetý týraly qujattar rásimdelgen. Alaıda jumystar múlde oryndalmaǵan. Jalǵan aktiler arqyly búdjet qarajaty affılıırlengen merdigerlerdiń shotyna aýdarylyp, keıin qolma-qol aqshaǵa aınaldyrylǵan.

Tergeý barysynda kúdiktilerdiń qylmystyq tabysqa satyp alǵan múlikteri de anyqtaldy. Olardyń qatarynda Mercedes-Benz S-klass, Lexus LX570 markaly alty qymbat kólik pen Shymkent qalasynyń ortalyǵyndaǵy elıtalyq kotej bar. Jalpy quny 254 mıllıon teńgege baǵalanǵan bul múlikterge sot sanksıasymen tyıym salyndy.

Tórt kúdiktige qatysty bultartpaý sharasy retinde úı qamaqqa alý týraly sheshim qabyldandy. Qylmystyq is sotqa joldandy.