InfoHub Logo

Shymkentte memlekettik baǵdarlama aıasynda bólingen qarjyny jymqyrǵandarǵa qatysty qylmystyq is boıynsha tergeý aıaqtaldy. Bul týraly Qarjy monıtorıńi agenttigi habarlady.

Tergeý jáne negizgi kúdiktiler

Tergeý málimetteri boıynsha, «Aýyl sharýashylyǵyn qarjylaı qoldaý qory» AQ basqarmasynyń burynǵy tóraǵasy Omarov J.D. ózine qarasty kompanıalar men baqylaýdaǵy uıymdar arqyly, sonyń ishinde Green Mart Kazakhstan JSHS-men birge qarjy jymqyrý sqemasyn uıymdastyrǵan.

Taýarlar men qyzmetterdi satyp alý básekelessiz, negizinen bir jetkizýshiden júrgizilgen. Sonymen qatar, jabdyqtar men jumystardyń quny jasandy túrde asyrylyp, keıbir is-sharalar múldem oryndalmaǵan.

Osyǵan qaramastan, oryndalǵan jumystar týraly jalǵan aktiler resimdelip, solardyń negizinde búdjet qarajaty aýdarylǵan.

Shyǵyn jáne zańsyz sýbsıdıalar

Nátıjesinde memleketke 430 mıllıon teńgeden astam qarjylaı shyǵyn keltirilgen.

Buǵan qosa, agroónerkásip kesheni salasynda ınvestısıalyq sýbsıdıalardy zańsyz alý faktileri anyqtaldy. Ol úshin aýyl sharýashylyq kooperatıvteri qurylyp, olar arqyly baqtardy damytý jáne shyǵyndardy óteý úshin qarjylandyrýǵa ótinimder berilgen.

Bul qurylymdardyń shottaryna 327 mıllıon teńgeden astam qarjy aýdarylǵan. Alaıda, qarajattyń shamamen 20 paıyzy ǵana maqsatty túrde paıdalanylǵan, al 250 mıllıon teńgeden astamy senimdi tulǵalar arqyly qolma-qol aqshaǵa aınaldyrylyp, maqsatsyz jumsalǵan.

«Sottyń sanksıasymen quny 1 mıllıard teńgeden asatyn 108 gektar jer telimine tyıym salyndy. Kúdikti Omarov J.D. qamaýǵa alyndy. Qylmystyq is sotqa jiberildi», - dep habarlady QMA.

Esterińizge sala keteıik, 2025 jyldyń tamyz aıynda osy is boıynsha qordyń burynǵy basqarýshy dırektory Iskakov M.K. jáne Green Mart Kazakhstan JSHS basshysy Sazynbek R.B. 8 jylǵa bas bostandyǵynan aıyrylyp, 4 avtokóligi tárkilengen bolatyn.

Aýyl sharýashylyǵyn qarjylaı qoldaý qorynyń burynǵy basshysy 2025 jyldyń qazan aıynda ustalǵan edi.