InfoHub Logo

Shymkenttegi ýaqytsha ustaý ızolátorynda 23 jastaǵy Sanıa Jubanyshevanyń ólimi eldi eleń etkizdi. Qyzdyń advokaty Muhammed Alıosmannyń aıtýynsha, Sanıany negizsiz qamaýǵa alǵan. Ol oqıǵanyń mán-jaıyn jáne janjal bolǵan jerden alynǵan beınejazbalardy elemeı, qyzdy kináli dep tanyǵan.

Bul týraly Infohub.kz aqparat agenttigi habarlaıdy.

Qorǵaýshynyń málimetinshe, qyzǵa QR QK-niń 106-baby 2-bóligi boıynsha – densaýlyqqa qasaqana aýyr zıan keltirdi degen aıyp taǵylǵan.

Janjal túnde ne boldy?

Advokattyń sózine súıensek, 2 mamyr kúni túnde Sanıa tanysy Aslannyń úıine barǵan. Sol jerde bir top jastar mas kúıinde bolǵan. Qorǵaýshynyń aıtýynsha, úı ishinde qyzdy zorlamaq bolǵan. Sanıa qarsylyq kórsetip, syrtqa shyǵyp ketip, dostaryna geolokasıasyn jiberip, polısıa shaqyrýdy ótingen.

Syrtta er adamdar arasynda janjal týyndaǵan. Advokattyń aıtýynsha, qyz bul jaǵdaıdy ózi telefonǵa túsirgen. Qorǵaýshynyń sózine qaraǵanda, vıdeoda qatysýshylardyń biri pyshaq ustap: «Baýyzdamaı ketpeımin» dep aıqaılaǵan.

Keıinnen polısıa úıden pyshaq jaraqaty bar jas jigitti tapqan.

«Jábirlenýshini kináli etti»

Advokat tergeýshiler Sanıanyń zorlaý áreketi týraly sózderin elemegenin, onyń ornyna oǵan densaýlyqqa qasaqana aýyr zıan keltirgeni týraly aıyp taǵýǵa kóbirek kóńil bólgenin málimdedi.

«Qyzdyń zorlaý áreketi jáne jynystyq tıisý týraly aryzy nege nazardan tys qalyp jatyr? Er adamdar arasyndaǵy qarýly janjal tirkelgen beınejazba nege eskerilmeıdi?» – dep málimdedi Alıosman.

Onyń aıtýynsha, qorǵaýshy tarapy sottan úı qamaǵy nemese kepildik sıaqty jeńil shara qoldanýdy suraǵan. Advokat tergeý sýdıasyna júgingenin jáne qyzdy qamaýǵa alýdyń áli erte ekenin aıtyp, talap etkenin aıtady.

Sot otyrysy 14 mamyr kúni keshki saǵat 21:00 shamasynda aıaqtaldy.

«Sanıa, men seni shyǵaramyn»

15 mamyr kúni túnde, shamamen 03:00-de, IVS-te qyzdyń qaıtys bolǵany týraly habar keldi. Advokattyń aıtýynsha, ony basqa jerge aýystyrar aldynda Sanıamen sóılesýge úlgergen.

«Aýystyrar aldynda men oǵan: «Sanıa, men seni shyǵaramyn. Maǵan senemisiń?» dedim. Ol «Iá…» dep jaýap berdi», – dep jazdy ol.

Beıne úndeýinde Alıosman el bıligine emosıonaldy túrde júgindi. Ol óziniń pikirinshe, kináliler jaýapqa tartylýy kerek dedi.

«Kinásiz adamdardy qamap, kináliler bos júrgende óte aýyr bolady», – dedi qorǵaýshy jáne advokattardy «eshkim tyńdamaıtynyn», al júıeniń «aıyptaý baǵytynda» jumys isteıtinin aıtty.

Polısıa ne deıdi?

Shymkent qalalyq polısıa departamenti (PD) Sanıany janjal kezinde kámeletke tolmaǵan balany pyshaqtap soqqyǵa jyqqany úshin kúdikti retinde ustaǵanyn habarlady. 14 mamyrda mamandandyrylǵan tergeý soty eki aı merzimge qamaýǵa alýǵa sanksıa bergen. Qyz qaıtys bolǵannan keıin qylmystyq is qozǵaldy.

Polısıanyń málimetinshe, ólimniń sebebi dárilik preparatpen ýlaný bolǵan. Vedomstvo zorlyq-zombylyq belgileriniń joq ekenin málimdedi.

«Tergeý is-sharalarynyń kesheni júrgizilýde. Bolǵan oqıǵanyń barlyq mán-jaıy tolyq, jan-jaqty jáne obektıvti tergeý barysynda anyqtalady», – dep habarlady PD.

Tergeý Shymkent polısıasynyń basshylyǵynyń baqylaýynda.