InfoHub Logo

 

Islamǵa quzǵyndaıyn shúıilgen,

Moldalarǵa qabaqtary túıilgen.

«Alla» dep em áldeqalaı baıqamaı,

Búıideıin  búre ketti búıirden.

-Ne dediń?- dep surady ol sustanyp.

-Jáı,- deımin ǵoı baıaǵy.

-Estidim ǵoı «Alla» dediń sen anyq,

Úlken aıǵaı bop ketken edi aıaǵy.

-Komsomolsyń, «Alla» deısiń taǵy da,

Nadansyń,- dep tıdi dersiń shamyma.

Ol kezderde minezimiz bolatyn ed tym shadyr,

Sart etkizip,salyp qaldym jaǵyna,

Sol-aq eken qýǵyn-súrgin bastaldy,

Komsomoldan shyǵaryp-aq tastady.

Qaıtem bárin kórgenimniń tizbektep,

Shashymdy aldy, ornynda bas qaldy.

Sol ateıs kórshi boldy menimen,

Júrip jattyq árkim óz jónimen.

Bireý birde esik qaqty tún ishi

Entigip tur  bir áıel

 Tarylǵandaı tynysy.

-Úıdegi aǵań betin ońǵa burdy anyq,-

Dedi-daǵy sybyr etti surlanyp.

-Mine, adres ertip kel sen moldany,

Tek syr shashpa,- dep,- tiri janǵa,- ótindi.

Molla maǵan: «Birge júr»,- dep bolmady.

Syrqat meniń ateısim bop shyqty.

Arpalysyp jatsa-daǵy dertimenen

Meni anyq tanyǵan ed ol-daǵy.

-Alla, Alla,- dep esinen san jańyldy.

Qansha ret dem salǵyzdy kim bilsin,

Al men bolsam kúıinishten

Soqqan edim sanymdy.

Ateıser Alla atyn ataýǵa da shoshynǵan,

Syr ashatyn keıde osylaı tosynnan.

Úkimetti, adamdardy aldaýmenen kúneltip,

Talaılardy tútetin ed jún etip...

Sol ateıs kórinbeıdi bul kúnde

Ketti me eken álde olardyń kúni ótip?-

Dep Sarybaı maǵan saýal tastady.

-Bile almadym.

Meniń oıym basqa-dy:

Ateıser qurydy ma- qurysyn,

Ashyq bolsyn dinsizderden

Táýelsiz el aspany.

Súleımen Baıazıtov

---