InfoHub Logo

Blogerler Erbolat Janabylov pen Elmıra Tolegenovanyń qylmystyq isi boıynsha sot otyrysynda kýágerdiń jalǵan kórsetki bergeni týraly kúdik týyndady. Bul týraly Infohub.kz aqparat agenttigi habarlaıdy.

Sot zalyndaǵy jaǵdaı

Mobılograf Sara Qymbatovanyń sotta kýálik etýi kezinde, onyń tek qazaq tilinde sóıleıtini belgili boldy. Bul jaǵdaı memlekettik aıyptaýshy Oljas Qaırýllaevtyń nazaryn aýdardy. Prokýror kýágerdiń áleýmettik jelidegi paraqshalarynda qazaq jáne orys tilderinde sóılesip, jazbalar júrgizetinin alǵa tartty.

Osyǵan baılanysty, prokýror kýágerdi jalǵan kórsetki berdi dep aıyptap, QR Qylmystyq kodeksiniń 420-baby «Kórineý jalǵan kórsetki berý» boıynsha qylmystyq quqyq buzýshylyq belgileriniń bar-joǵyn tekserý týraly ótinishhat joldady.

Sara Qymbatova óz jaýabynda, orys tilindegi beınerolıkterdiń kóbirek kórermen jınaıtynyn, sondyqtan aýdarma qosymshalaryn qoldanyp, mátindi aldyn ala jattap, vıdeolardy montajdaıtynyn, alaıda orysshany erkin meńgermeıtinin túsindirdi.

Qorǵaýshy taraptyń ustanymy

Blogerlerdiń qorǵaýshysy Gaýhar Aıtjanova prokýrordyń ótinishhatyn qanaǵattandyrýǵa qarsy shyqty. Ol kýágerdiń qandaı tilde sóıleıtini istiń mán-jaıyna tikeleı qatysty emes jáne jalǵan kórsetki retinde baǵalanbaıtynyn aıtty.

«Qyz áleýmettik jelilerdi júrgizý úshin aýdarma baǵdarlamalaryn paıdalanǵan. Meniń oıymsha, kýágerge qysym kórsetilip otyr», - dedi zańger.

Sýdıa Ádilbek Baımahanov ótinishhat boıynsha sheshim keıinirek qabyldanatynyn habarlady.

İstiń mán-jaıy

Astana qalalyq qylmystyq ister jónindegi mamandandyrylǵan aýdanaralyq sotynda jubaılardyń isi boıynsha tergeý jalǵasýda. Ulysmedia.kz bul prosesti baqylap otyr.