InfoHub Logo

Shyǵys Qazaqstan oblysy ákiminiń burynǵy birinshi orynbasary Jansaıa Omar alty jylǵa bas bostandyǵynan aıyrý týraly sot úkimine shaǵymdanýda. Ol sybaılas jemqorlyq áreketteri úshin kináli dep tanylyp, jazaǵa kesilgen bolatyn.

Bul týraly Infohub.kz aqparat agenttigi habarlaıdy.

Sot kabınetiniń derekterine súıensek, Jansaıa Omar sot úkimine apelásıalyq shaǵym túsirgen. Sot otyrysy 20 mamyr kúni saǵat 11:00-de ótedi dep josparlanǵan. Ol ýaqytqa deıin Omardyń bultartpaý sharasy qamaýda ustaý túrinde saqtalady.

İs boıynsha ne belgili?

Buǵan deıin Shyǵys Qazaqstan oblysy ákimdiginde sottalǵan basshynyń ornyna áli kúnge deıin jańa adam taǵaıyndalmaǵany habarlanǵan edi. Oblys ákimdigi jańa taǵaıyndaý máselesin apelásıalyq sottyń sheshimi shyqqannan keıin qaraıtynyn málimdedi. Alaıda, oblys ákimdiginiń resmı saıtynda Jansaıa Omardyń derekteri «Jetekshilik» bóliminen alynyp tastalǵan.

Jansaıa Omarǵa taǵylǵan aıyptar

3 sáýirde Óskemen qalasyndaǵy aýdanaralyq sot Jansaıa Omardy alaıaqtyq jáne paraqorlyq áreketteri úshin kináli dep tanyp, ortasha qaýipsizdik mekemesinde 6 jylǵa bas bostandyǵynan aıyrýǵa úkim etti. Onyń Toyota Camry avtokóligi tárkilenip, memlekettik qyzmette jumys isteý quqyǵynan ómir boıyna aıyryldy. SHQO prokýratýrasy Omardyń áreketteri «memlekettik qyzmet negizderine jáne qoǵam senimine nuqsan keltiretinin» atap ótti.

Sotta Jansaıa Omar óz kinásin tolyq moıyndap, biraq sońǵy sózinde sottan raqymshylyq jasap, merzimdi aıyppulmen aýystyrýdy suraǵan bolatyn. Ol memleketke salmaq bolmaı, óz úlesin qosqysy keletinin aıtyp, qaryzǵa batsa da aıyppuldy tóleıtinin málimdegen.

Esterińizge sala keteıik, SHQO ákiminiń orynbasarynyń ustalǵany týraly aqparat 13 aqpan 2026 jyly paıda bolǵan edi. Sol kezde resmı organdar sheneýniktiń «densaýlyǵyna baılanysty ýaqytsha demalysta» ekenin ǵana habarlaǵan.