InfoHub Logo

«Suńqar» («Soıýz-5») zymyran-tasyǵyshynyń alǵashqy synaq ushyrylymy 26 sáýirge deıingi kezeńge josparlanyp otyr. Bul týraly kosmodromdaǵy derekkóz habarlady.

Bul týraly Infohub.kz aqparat agenttigi habarlaıdy.

Buǵan deıin josparlanǵan 13-16 sáýir aralyǵyndaǵy rezervtik ushyrý kúnderiniń 26 sáýirge deıin aýystyrylýyna ushyrý kesheniniń jabdyqtary men zymyran-tasyǵysh júıelerin qosymsha tekserý qajettiligi sebep bolǵan. Qajetti tekserýler men kemshilikter joıylǵannan keıin, memleketaralyq komısıa ushyrý kúni týraly sheshim qabyldaıdy.

«Suńqar» zymyranynyń tarıhy

Bastapqyda «Suńqar» zymyranyn 27 naýryzda ushyrý kózdelgen bolatyn. Alaıda, tehnıkalyq sebepterge baılanysty ushyrý kúni rezervtik kúnderge aýystyryldy.

31 naýryzda «Soıýz-5» zymyrany paıdaly júk maketimen birge montajdaý-synaq korpýsynan shyǵarylyp, 45-shi alańdaǵy ushyrý qurylǵysyna tik kúıde ornatyldy.

«Báıterek» jobasy

«Báıterek» ǵarysh zymyran kesheni – Qazaqstan men Reseıdiń Baıqońyr kesheninde ekologıalyq taza otyn komponentteri bar zymyranmen ǵarysh ushyrýdy júzege asyrý úshin jerústi ǵarysh qurylymyn qurý boıynsha birlesken jobasy. Joba 2004 jyly qurylyp, 2005 jyly Baıqońyr ǵarysh aılańyna sol kezdegi Qazaqstan men Reseı prezıdentteri Nursultan Nazarbaev pen Vladımır Pýtınniń sapary kezinde resmı túrde bastaldy.

Alǵashqyda «Angara» zymyran-tasyǵyshyn paıdalaný josparlanǵan bolatyn. Ol úshin 200-shi alańdaǵy «Proton» zymyranyna arnalǵan burynǵy №40 ushyrý qondyrǵysynyń ornyna jerústi ushyrý keshenin salý kózdelgen edi.

Alaıda, keıinnen Reseıdiń josparlary ózgerip, «Energıa» zymyranyn synaýǵa arnalǵan 250-shi alańdaǵy ámbebap keshendi synaq-ushyrý ornynyń ornyna jańa alań usynyldy. Biraq bul nusqa da júzege aspady.

Keıinnen, «Zenıt» zymyran-tasyǵyshyn ushyrý baǵdarlamasy aıaqtalǵannan keıin, 42-shi alańdaǵy (montajdaý-synaq korpýsy) jáne 45-shi alańdaǵy (ushyrý kesheni) barlyq jerústi ınfraqurylymy Reseı Federasıasynyń «Baıqońyr» keshenin jalǵa alý shartynan shyǵarylyp, «Báıterek» BK-nyń menshigine berildi.

«Angara» zymyran-tasyǵyshynyń ushyrý kesheniniń qurylysy bastalmaı, ornyna jańa «Soıýz-5» zymyran-tasyǵyshy bekitildi. Bul zymyran úshin «Zenıt» KRK-synan qalǵan jerústi ınfraqurylymyn jetildirý arqyly paıdalanýǵa múmkindik týdy.

«Soıýz-5» zymyranynyń sıpattamasy

«Soıýz-5» zymyran-tasyǵyshy (burynǵy jobalyq ataýy «Ertis», qazaqsha ataýy «Suńqar») – eki satyly ortasha klastaǵy zymyran, Reseıdiń «Roskosmos» AQ-nyń «RKS «Progres» kásipornynda óndiriledi.

Tehnıkalyq sıpattamalary: zymyrannyń bıiktigi bas burylmaly qaptamasyna baılanysty – 58,8 metr nemese 65,2 metr; dıametri – 4,1 metr; ushyrý massasy – 526-531 tonna; tómengi orbıtaǵa shyǵarylatyn paıdaly júk massasy – 17,4 tonna; geostasıonarlyq orbıtaǵa – 2,5 tonna.

Qoldanylatyn otyn jáne totyqtyrǵysh – ekologıalyq qaýipsiz naftıl (kerosın túri) jáne suıyq ottegi.