InfoHub Logo

QR Bilim jáne ǵylym vıse-mınıstri Rústem Bıǵarı bilim berý salasyn sıfrlandyrý tetikteri jóninde aıtyp berdi.

Onyń aıtýynsha, Qazaqstannyń bilim berý júıesinde 20 myńnan astam uıym, 7 myń mektep, 860 kolej jáne 130-dan astam JOO bar.

«Sıfrlyq Qazaqstan» baǵdarlamasy aıasynda bilim berý salasyn sıfrlandyrý jumystaryn bastadyq. Mektepterde elektrondy jýrnal, elektrondy kúndelik syndy túrli júıeler paıda boldy. Kásipkerler men startapshylar úshin de múmkindik kóp. «Sıfrlyq Qazaqstan» baǵdarlamasyna deıin sıfrlyq tehnologıalardy engizý - kompúterlik qurylǵylardy ornatý dep qabyldanatyn. Shyn máninde, sıfrlyq tehnologıalardy engizý – úlken eńbek», - dedi Rústem Bıǵarı búgin Astana Hub tehnoparkinde áleýmettik ınovasıalar zerthanasynyń ashylýynda.

Vıse-mınıstr elimizde Ulttyq bilim berý derekter qorynyń jumys isteıtinin jáne mektepterge vırtýaldy shyndyq jobalarynyń engizilip jatqanyn habarlady.

«Mektepterde júzege asyrylýy tıis jobalar kóp. Robototehnıka kabınetteri, STEM-zerthanalar aıasynda vırtýaldy shyndyq jobalary engizilip jatyr. Qazaqstannyń bilim berý júıesiniń ózi standarttardy júzege asyrýǵa negizdelgen. Bilim berý júıesinde memlekettik bilim berý standarttary uǵymy bar. Iaǵnı, kez kelgen oqýlyqqa saraptama júrgiziledi. Al vırtýaldy shyndyq, zerthana synyptary ázirge qosymsha bilim berý júıesi retinde engizilip jatyr. Osyǵan baılanysty, jańa tehnologıalarǵa esh kedergi joq», - dedi ol.

Aıta keteıik, Astana Hub halyqaralyq IT-startaptar tehnoparki men BUU Balalar qory (IýNISEF) balalar múddesin qorǵaıtyn «Social Innovation» áleýmettik ınovasıalar zerthanasyn ashty. Onyń qyzmeti zamanaýı tehnologıalar arqyly balalardy túrli syn-qaterden qorǵaıtyn jobalardy júzege asyrýǵa baǵyttalǵan.

---