InfoHub Logo

Almaty oblysy, Talǵar aýdany, Belbulaq aýylynyń turǵyndary Panfılov dıvızıasyna arnalǵan eskertkish mańyndaǵy qurylys jumystarynan shaǵymdandy. Olardyń aıtýynsha, kásipker memlekettik jerdi ıelenip, turaq salý úshin shuńqyr qazyp, aǵashtardy kesip tastaǵan.

Bul týraly Infohub.kz aqparat agenttigi habarlaıdy.

«Jergilikti turǵyndar shokta»: Ne boldy?

Turǵynnyń áleýmettik jelidegi jazbasynda aıtylǵandaı, Belbulaq aýylynda Panfılov atyndaǵy 8-gvardıalyq dıvızıanyń qurylýyna arnalǵan mańyzdy tarıhı nysan bar. Bul memorıaldyń aınalasynda kóp jyldyq aǵashtar ósken.

Jazba avtorynyń aıtýynsha, aýyldyqtar jyldar boıy bul jerge kútim jasap, gúl egip, qorshaýdy boıap, tazalyqty saqtap kelgen. Alaıda, qazir bul aýmaq qaýip astynda qalǵan.

Turǵynnyń sózine qaraǵanda, eskertkishtiń artynda bos turǵan dúken bolǵan. Sol mańaıdaǵy turǵyndardyń trassaǵa shyǵatyn joly da bar edi.

«Ol dúkenniń aldyna turaq salýdy uıǵardy. Eki apta buryn qurylys jumystaryn bastap, jerdi ıelenip, shuńqyr qazdy. Eskertkish mańyndaǵy birneshe aǵashty kesip tastady. Kórshi úıge kirer esikti jaýyp, ótý jolyn bógep tastady. Jergilikti turǵyndar mundaı áreketke qatty ashýlandy. Olar aryz jazdy, biraq ázirge esh nátıje joq», - dep jazdy turǵyn.

Ákimdik ne deıdi?

Tengrinews.kz tilshisi Almaty oblysy, Talǵar aýdany ákimdiginen túsinikteme aldy.

Vedomstvonyń habarlaýynsha, Belbulaq aýyldyq okrýginiń bıligi tıisti organdarmen birlesip, oqıǵa bolǵan jerde tekserý júrgizgen.

Tekserý barysynda kásipkerdiń Panfılov dıvızıasyna arnalǵan jer ýchaskesinde ruqsat qujattarynsyz jer jumystaryn júrgizgeni anyqtaldy.

«Bul fakti boıynsha turǵyndar polısıa organdaryna aryz berdi. Atalǵan aýmaqta eshqandaı jumys júrgizýge bolmaıtyny týraly túsindirilgenine qaramastan, menshik ıesi jumysty jalǵastyra bergen. Sol sebepti materıaldar prosesýaldyq sheshim qabyldaý úshin Talǵar aýdandyq polısıa bólimine jiberildi», - dep habarlady ákimdik.

Ákimdik málimetinshe, jaǵdaı ákimshilik pen polısıanyń baqylaýynda.

«Jer ýchaskesiniń menshik ıesimen aýmaqty tıisti deńgeıde ustaý máselesi boıynsha profılaktıkalyq áńgime júrgizildi. Nátıjesinde, ol ýchaskeni abattandyrý jumystaryn júrgizýge mindetteme aldy. Qazirgi zańnama aıasynda qosymsha sharalar qabyldanady», - dedi ákimdik.

Tengrinews.kz oqıǵanyń damýyn baqylaýdy jalǵastyrady.