InfoHub Logo

Qazaqstandyq ánshi Tamara Asar shetelde aıaǵyndaǵy protezin aýystyrý operasıasynan keıingi jaǵdaıyn áleýmettik jelide bólisip, kópshilikti tolqytty. Óner ıesi jańa protezben júrip úırenýdiń ózine ońaı soqpaǵanyn, ár qadamynyń úlken eńbek pen erlikpen kelgenin jetkizdi.

Bul týraly Infohub.kz aqparat agenttigi habarlaıdy.

Ánshiniń aıtýynsha, úsh kúnnen beri jańa protezben «táı-táı basyp» júrip úırenip jatyr. Bul kezeńdi ol ózi úshin úlken synaq dep atap, árbir qadamnyń mańyzyn erekshe atap ótti.

Júrip úırenýdiń qıyndyǵy

«Otyrǵan ornyńnan kóterilip, mup-muzdaı bolǵan aıaqqa durys miný – jetistik. Bir jaqqa aýyp ketpeı, tepe-teńdikpen boıyńdy tik ustaý – jeńis. Óz komfortyna jaıǵasyp alǵan jyly deneniń aýyrsynýyna, qajalǵanyna qaramaı kúrdeli kezeńge baǵyttap, bosata bilý – kóný arqyly kelgen erlik», - dep jazdy Tamara Asar.

Ánshi árbir basqan qadamdy myń ret qaıtalaýǵa teńep, «qajalǵannyń qanymen, aýyrsynýdan sorǵalaǵan terge boı bermeý – jeńis» ekenin aıtty. Onyń sózinshe, oıdaǵydaı, nyq basylǵan árbir qadam – bul jemis, al táni men janyn Allaǵa tapsyryp, baǵyný arqyly baǵyndyrý – rahat.

«Bári ómirdegideı, al ómir – kádimgi sporttaǵydaı», - dep túıindedi ánshi.

Esterińizge sala keteıik, Tamara Asar buǵan deıin jol apatynan keıin aıaǵynan aıyrylǵan bolatyn.