InfoHub Logo

Qazaqstandyq tanymal kásipker Arsen Tomskıı Olımpıada chempıony Mıhaıl Shaıdorovtyń ákesine Audi Q8 avtokóligin syılaıtynyn málimdedi. Bul týraly Infohub.kz aqparat agenttigi habarlaıdy.

Kásipkerdiń aıtýynsha, avtomobıl Mıhaıldyń ákesi Stanıslav Aleksandrovıchke beriledi. Kólik qazirgi tańda Audi Almaty ortalyǵynda ıesin kútip tur.

Chempıonǵa jáne onyń ákesine alǵys

Arsen Tomskıı Mıhaıldyń jetistigine rızashylyǵyn bildirip, onyń ákesine arnaıy alǵys aıtty. «Mıhaılǵa osy qýanysh pen maqtanysh sezimi úshin alǵys aıtamyn. Bul – shabyt syılaıtyn, erekshe stıldegi altyn jeńis. Osyndaı tabystyń bastaýynda turǵan adamǵa rızashylyǵymdy bildirgim keledi. Sondyqtan Audi Q8 kóligin chempıonnyń ákesine syıǵa tartamyn», – dedi kásipker.

Ákeniń uly úshin jasaǵan qurbandyǵy

Kásipker Stanıslav Aleksandrovıchtiń buryn ulynyń sporttyq armany úshin óz kóligin satyp jibergenin eske saldy. Mıhaıldyń alǵashqy bapkeri bolǵan ákesi balasynyń sporttaǵy jolyna úlken qoldaý kórsetken.

«Bir kezderi ol ulynyń armany úshin óz kóligin satty. Búgin sol arman altyn júldege aınaldy. Endi bul kólik ortaq alǵysymyzdyń belgisi bolsyn!» – dep jazdy Arsen Tomskıı.

Aıta keteıik, Mıhaıl Shaıdorov – Qazaqstan tarıhyndaǵy mánerlep syrǵanaýdan tuńǵysh Olımpıada chempıony. Buǵan deıin ánshi Dımash Qudaıbergen de sportshyǵa kólik syılaıtynyn habarlaǵan bolatyn.