InfoHub Logo

Táýelsizdik! Netken uly ári qudiretti sóz! Osy kıeli sózge tereń úńilsek, ata-babalarymyzdyń san ǵasyrlar boıy armandaǵany, bostandyq jolynda qurban bolǵan rýhty qazaǵymnyń rýhty urpaqtaryna qaldyrǵan murasy ekeni haq.

Ór rýhty, qasqyr minezdi, erjúrek, aıbyndy qazaq halqyna Táýelsizdik aspannan túsken syı emes. Táýelsizdikke jetý úshin ata-babalarymyz basynan talaı syndy ótkerdi jáne sol synǵa kúsh-jigermen, qaısar minezben tótep berdi. Ushqan qustyń qanaty talatyn keń-baıtaq dalany ata-babalarymyz aq naızanyń ushymen, aq bilektiń kúshimen qasyq qany qalǵansha qorǵady. Uly dalada halqymyz úsh ǵasyrdaı egemendik pen azattyq jolynda kúresti. «Biz qazaq degen mal baqqan elmiz, biraq eshkimge soqtyqpaıjaı jatqan elmiz. Elimizden qut-bereke qashpasyn dep, jerimizdiń shetin jaý baspasyn dep naızaǵa úki taqqan elmiz, eshbir dushpan basynbaǵan elmiz, basymyzdan sózdi asyrmaǵan elmiz...», - dep Qaz daýysty Qazybek bıdiń qalmaq hany Qaldan Serenge aıtqan sózinen halqymyzdyń eshkimge qıanat jasamaı, qashan da beıbitshilikti tý etip ustaǵan beıbit halyq ekenine kóz jetkizemiz.

Joǵaryda atap ótkenimdeı, táýelsizdik qazaq halqyna ońaı kelgen joq. Keń baıtaq dalamyzǵa kóz alartyp, beıbit eldiń berekesin ydyratqan sol aramza jaýlardyń atyn ataýǵa aýzym batpaıdy. Jońǵardan tepkinshilik kórip, «kórshisiń Qudaıyndaı kórgen» halyq Reseıdiń jaýyryna tyǵylady. Sonda Reseı ne istedi? Elde saıası reformalar ornatyp, birligi mol halyqtyń aýyzbirshiligin joıýǵa baryn saldy. El arasyna iritki salyp, qazaq memlekettiginiń saqtalýy jolyndaǵy kúres jaǵdaıyn óz múddelerine sheber qoldandy. Eldi bytaryńqylyq jaılap, ádiletsizdik oryn ala bastady. Táýelsizdik ansaǵan batyrlarymyz kóteriliske shyǵyp, jan berispeı kúreskenimen jeńiske jete almady. Qara halyqty patsha ókimeti qul retinde kórip, azaptap, qınady. Qanshama zıaly, bilimdi tulǵalardy ólim jazasyna kesip, baqılyq etti. Halyqty birlikke, bilimge shaqyrǵan ult zıalylary jazyqsyzdan jazyqsyz aıdalyp, bir aýyz sýǵa zar boldy. Kóteriliske shyǵýǵa úndegen azamattardy halyqtyń kózinshe asyp qoıyp, jan tásilim etkizdi. Baı-baǵlandardyń saý balalary aqsha berý arqyly jumystan qalsa, kedeıdiń aýrý-syrqaý balalary aýyr azapqa tartyldy. Halyqty jappaı qanap, beıshara kúıge túsirdi. Netken qatigezdik?! Biraq olar ór rýhty qazaq halqynyń jigeri men namysyn óshire almady...

Bostandyqty ańsaǵan jastarymyz sol jeltoqsannyń yzǵarly kúninde alańǵa shyqty. Patsha ókimeti adamdary qazaq qyzdarynyń shashynan súırep, uldaryn ólgenshe sabap, qorlyq kórsetti. Sonda da qazaq jastary táýelsizdik úshin ólýden qoryqpady. Nátıjesinde, azapty kúnderden keıin jarqyrap kún sáýlesi shyqty. Alladan berilgen syı – táýelsizdikke qol jetkizdik. «Qazaqstan Respýblıkasy» ataǵyn alyp, bostandyqqa shyqtyq. Qanshama ǵasyr «torda ustalǵan búrkitteı» kókke shyqqanda qalyqtap ushtyq. Allaǵa shúkir, elimiz az ýaqyttyń ishinde gúldenip, damydy. Burynǵy Qazaqstan men qazirgi Qazaqstandy salystyrýǵa da kelmeıdi. Kórshiles eldermen terezemiz teń... Qazaqstandy búkil álem tanıdy, biz onymen maqtanamyz!

Sóz sońynda osynaý qıyndyqpen, azappen kelgen uly syıymyzdyń qadir-qasıetine jete bileıikshi degen nıetimdi bildirgim keledi. Qanmen kelgen egemendikti alaqanymyzda aıalap, elimizdi damytý úshin qyzmet jasaý – bizdiń mindet! Kók baıraǵy jelbiregen, búgingideı abyroıly da aıbyndy, bedeldi de berekeli, yntymaǵy men birligi jarasqan elimizdiń táýelsizdigi baıandy bolǵaı. Táýelsizdik tańy araılap atyp, egemendigimiz eńseli bolsyn! Elimiz aman, jurtymyz tynysh bolsyn!

Abylaı han atyndaǵy Qazaq Halyqaralyq Qatynastar jáne Álem Tilderi Ýnıversıtetiniń 1 kýrs stýdenti Aıtmolda Amına

---