InfoHub Logo

Qazaqstannyń mánerlep syrǵanaýdan alǵashqy Olımpıada chempıony Mıhaıl Shaıdorovtyń birneshe aı boıy jalaqy almaǵany týraly másele kóterildi. Májilis depýtaty Asqat Rahymjanov bul jaǵdaıǵa qatysty pikir bildirip, tártip ornatyp, kinálilerdi jazalaý qajettigin aıtty.

Bul týraly Infohub.kz aqparat agenttigi habarlaıdy.

«Shynymdy aıtsam, kez kelgen sporttyq jetistik – bul eń aldymen memlekettiń ımıji. Elimizdiń sportty qalaı qoldaıtynyna, sportshylarymyzdyń qandaı deńgeıde óner kórsetetinine qarap, memlekettiń qanshalyqty damyǵanyn, halyqaralyq ımıjin qalyptastyrýǵa daıyn ekenin baǵalaýǵa bolady. Ásirese, bul másele Olımpıada oıyndaryna qatysty bolǵanda, sportshylardy daıarlaýǵa qansha qarajat bólinetini týraly buǵan deıin de kóptegen materıaldar jaryq kórgen. Meniń oıymsha, bul salada belgili bir tártip ornatý qajet», - dedi Rahymjanov májilis kýlýarynda.

Sportshylarǵa bólinetin qarajattyń ashyqtyǵy

Depýtattyń aıtýynsha, sportshylardy daıarlaýǵa, Olımpıada rezervin qalyptastyrýǵa bólinetin qarajattyń ashyqtyǵy men eseptiligi joǵary bolýy tıis.

«Eger sportshy jalaqysynan aıyrylyp nemese qandaı da bir qysqartýlarǵa ushyrap jatqanyn aıtsa, onyń sebepsiz aıtylmaıtyny anyq. Óıtkeni, biz túsingendeı, sportshylar – namysshyl jandar. Olar eshqandaı dáleli joq, jaıdan-jaı jaman sóz aıtpaıdy. Sondyqtan bul máseleni egjeı-tegjeıli qarastyrý kerek dep esepteımin. Árıne, kinálilerdi jazalaý qajet. Sportshylardy daıarlaýda nemese qandaı da bir sport klýbyn, fýtbol klýbyn qarjylandyrýda elde sybaılas jemqorlyqtyń bar ekeni eshkimge jańalyq emes. Sondyqtan bul másele memleket basshylyǵynyń erekshe baqylaýynda bolýy tıis», - dep atap ótti Rahymjanov.