InfoHub Logo

1 shildeden bastap Qazaqstanda elektr samokattaryn paıdalanýǵa qatysty jańa erejeler qoldanysqa engiziledi. İshki ister mınıstrliginiń habarlaýynsha, bul ózgerister negizinen jalǵa beriletin samokattarǵa qatysty bolady. Jeke elektr samokattarynyń ıelerine ázirge mindetti tirkeý nemese nómir belgileý talap etilmeıdi.

Bul týraly Infohub.kz aqparat agenttigi habarlaıdy.

Jalǵa beriletin samokattarǵa qoıylatyn talaptar

Jańa erejeler boıynsha, jalǵa beriletin elektr samokattar mindetti túrde azamattyq-quqyqtyq jaýapkershilikti saqtandyrý shartymen qamtamasyz etilýi tıis. Bul shara jol-kólik oqıǵalary kezinde keltirilgen zalaldy óteýdi qamtamasyz etý maqsatynda engizilip otyr.

Mınıstrliktiń málimetinshe, saqtandyrý polısi men belgilengen úlgidegi tirkeý nómiri bar jalǵa beriletin samokattar ǵana jol qozǵalysyna qatysa alady.

Kıksherıng kompanıalaryna qosymsha mindetter

Saqtandyrý men nómir belgileýden bólek, kıksherıng kompanıalaryna qosymsha jaýapkershilikter júkteledi. Olar samokattardy esepke alýy, tehnıkalyq jaǵdaıyn baqylaýy, jyldamdyqty shekteýi, qurylǵylardyń ornalasqan jerin qadaǵalaýy, jol erejesin buzýdyń aldyn alýy jáne derekterdi ishki ister organdaryna berýi kerek.

Jeke samokat ıelerine qatysty jaǵdaı

İshki ister mınıstrligi jeke tulǵalarǵa tıesili elektr samokattaryna bul talaptardyń qoldanylmaıtynyn naqtylady. Qazirgi ýaqytta olar úshin mindetti tirkeý nemese nómir alý qarastyrylmaǵan.

Alaıda, jeke samokat ıesi kólik jolyna shyqsa, jol erejesin saqtaýǵa jáne júrgizýshi kýáligin ustaýǵa mindetti bolady.

Esterińizge sala keteıik, 1 shildeden bastap jańa normalar kúshine enedi. Atap aıtqanda, Ákimshilik quqyq buzýshylyq kodeksiniń 619-2-baby engizilip, jalǵa berý qyzmetteriniń 18 jasqa tolmaǵan nemese júrgizýshi kýáligi joq tulǵalarǵa samokat bergeni úshin 108 125-ten 173 000 teńgege deıin aıyppul tóleýi qarastyrylǵan.