InfoHub Logo

Temirtaýdaǵy "Qarmet" metalýrgıa kombınatynda óndiristi jańǵyrtý baǵdarlamasy aıasynda kýznechno-pressteý sehyn qalpyna keltirý jumystary aıaqtalýǵa jaqyn. Bul seh kásiporynnyń tehnıkalyq tizbegindegi mańyzdy býyn bolyp sanalady. Seh iske qosylǵannan keıin kombınattyń ishki qajettilikterin, ıaǵnı jabdyqtardy jóndeý jáne qyzmet kórsetý kezinde qajetti arnaıy elementterdi, bólshekterdi jáne agregattardyń jeke bólikterin daıyndaýdy qamtamasyz etetin bolady. Bul týraly "Qarmet" kompanıasynyń baspasóz qyzmeti habarlady.

Kompanıanyń málimetinshe, sehtyń jumysy 2019 jyly shatyr plıtalary men qabyrǵa panelderiniń apatty jaǵdaıyna baılanysty toqtatylǵan. Birneshe jyl boıy nysan bos turdy. 2024 jyly seh aýmaǵynda buzý jumystary bastaldy, al 2025 jyly joba qurylys jáne qalpyna keltirý jumystarynyń belsendi kezeńine kóshti.

Jańartylǵan sehtyń erekshelikteri

"Qazirgi ýaqytta jumystardyń aıtarlyqtaı kólemi oryndaldy. Shatyr tolyǵymen aýystyryldy, zamanaýı jeńildetilgen zenıttik shamdar ornatyldy, jańa qabyrǵa panelderi montajdaldy, jekelegen qurylymdyq elementter kúsheıtildi. Teserý nátıjeleri boıynsha keıbir beton baǵandaryn saqtaý týraly sheshim qabyldandy – bul úshin olar bandajdalyp, metal karkaspen kúsheıtildi. Tereze konstrýksıalary da aýystyryldy", - dep túsindirdi kompanıa ókilderi.

"Qarmet" málimetinshe, ǵımarat óziniń negizgi qurylymdyq erekshelikterin saqtap qalǵan, biraq aıtarlyqtaı jeńildep, zamanaýı sıpatqa ıe boldy. Aýyr beton shatyr jáne qabyrǵa panelderiniń ornyna jańa materıaldar qoldanyldy, bul nysannyń senimdiligin arttyrady, onyń bolashaq paıdalanýy men qyzmet kórsetýin jeńildetedi.

Óndiristik mańyzy

Qazirgi ýaqytta irgeles aýmaqta abattandyrý jumystary júrgizilýde. Sonymen qatar, sehtyń ishki ınfraqurylymyn daıyndaý jalǵasýda: ınjenerlik jelilerdi jańartý, kópirlik krandardy aýystyrý, elektr bóligin, santehnıka jáne jylytý júıelerin jańǵyrtý josparlanýýda. Jaqynda zaýytqa zamanaýı jabdyqtar kele bastaıdy.

Kompanıa kýznechno-pressteý sehyn qalpyna keltirý kombınat úshin úlken mańyzǵa ıe ekenin atap ótti.

"Búgingi tańda qajetti jumystardyń bir bóligin syrtqy uıymdardy tarta otyryp oryndaýǵa májbúrmiz. Al seh jumysy qaıta jandanǵannan keıin "Qarmet" ishki jóndeýler men jabdyqtardy jumys kúıinde ustaý úshin qajetti bólshekter men elementterdi óz kúshimen óndire alatyn bolady", - dep sendirdi kásiporyn basshylyǵy.

Kýznechno-pressteý sehynyń osy jyldyń sońyna deıin tolyqqandy jumys isteı bastaýy josparlanýda. "Qarmet" bul jobany jańǵyrtýǵa degen jańa kózqarastyń bir mysaly retinde qarastyrady: ýaqytsha sheshimdermen shektelmeı, óndiristik nysandardy keshendi túrde qalpyna keltirý, olardyń senimdiligin, qaýipsizdigin jáne tıimdiligin uzaq merzimdi perspektıvada arttyrý.