InfoHub Logo

Qazaqstan Respýblıkasy Tótenshe jaǵdaılar mınıstrligi byltyr satyp alynǵan Tesla Cybertruck elektromobıliniń qansha ret qutqarý operasıalaryna qatysqanyn, onyń qandaı jaǵdaılarda qoldanylǵanyn jáne bolashaqta mundaı kólikterdi kóbeıtý josparlanyp otyrǵanyn málimdedi.

Bul týraly Infohub.kz aqparat agenttigi habarlaıdy.

Tesla Cybertruck neshe ret qoldanyldy?

Mınıstrliktiń resmı suraýǵa bergen jaýabyna sáıkes, Tesla Cybertruck satyp alynǵannan beri úsh ret taýly aımaqtarda evakýasıalaý jumystary kezinde qoldanylǵan. Onyń biri túnde bolǵan.

Sondaı-aq, bul kólik tótenshe jaǵdaılar kezinde qoljetpeıtin aýdandarda «jyljymaly komandırlik-barlaý pýnkti» retinde paıdalanylady.

«Onyń paıdalanylýy taýly erekshe qorǵalatyn aýmaqtar úshin belgilengen ekologıalyq talaptardy saqtaı otyryp júzege asyrylady», — dep atap ótti mınıstrlik.

TJM málimetinshe, kólikti tańdaý kezinde jumys jaǵdaılary men qorshaǵan ortaǵa áserdi azaıtý qajettiligi eskerilip, Tesla Cybertruck-ke basymdyq berilgen. Vedomstvo avtomobılge qoıylǵan tehnıkalyq talaptar taýly jáne klımattyq jaǵdaılardy eskere otyryp qalyptastyrylǵanyn naqtylady.

«Qoıylatyn talaptar fýnksıonaldy sıpatta boldy jáne, atap aıtqanda, jol talǵamaıtyndyǵynyń joǵarylaýyn, avtonomıasyn, senimdiligin, zamanaýı qaýipsizdik, baılanys jáne navıgasıa quraldarynyń bolýyn, sondaı-aq avarıalyq-qutqarý jabdyqtaryn ornalastyrýǵa arnalǵan júk bóligin qamtydy», — delingen jaýapta.

Avtomobıldiń jabdyǵy

TJM habarlaýynsha, Tesla Cybertruck baılanys jáne habarlaý quraldarymen, spýtnıktik ınternetpen, qorǵalǵan esepteý tehnıkasymen, jylývızory bar kvadrokoptermen, qutqarý jabdyqtarymen jáne avtonomdy qýat kózderimen jabdyqtalǵan.

Bul jaǵdaıdy aldyn ala barlaý, shuǵyl qyzmetterdiń áreketterin úılestirý, jabdyqtardy jetkizý, tótenshe jaǵdaı ornynda jyljymaly basqarý pýnktin ornalastyrý jáne alǵashqy avarıalyq-qutqarý jumystaryn júrgizýge múmkindik beredi.

Avtomobıl Almaty qalasynyń taýly aımaqtarynda jáne oǵan jaqyn aýdandarda, týrıser men álpınıser jıi baratyn jerlerde izdeý-qutqarý jáne avarıalyq jumystardy júrgizý úshin qoldanylady.

Tesla Cybertruck-tiń kemshilikteri bar ma?

TJM Tesla Cybertruck-ti tótenshe jaǵdaılar kezinde paıdalanýda eshqandaı shekteýler men kemshilikter anyqtalmaǵanyn málimdedi. Sonymen qatar, vedomstvo tótenshe jaǵdaılarǵa jaýap berý úshin basqa da tehnıkalar qoldanylatynyn atap ótti.

TJM jańa Tesla kólikterin satyp ala ma?

Búdjet esebinen osyndaı avtomobılderdi satyp alý máselesi ázirge ashyq kúıinde qalyp otyr.

«Osyndaı kólikterdi satyp alý týraly sheshim paıdalanýdy keshendi taldaý jáne tıimdiligin baǵalaý nátıjeleri boıynsha qabyldanady», — dep atap ótti vedomstvo.

Tehnıkalyq qyzmet kórsetý shyǵyndary

TJM aqparaty boıynsha, Tesla Cybertruck avtomobıline tehnıkalyq qyzmet kórsetý jetkizýshiniń sharttyq mindettemeleri aıasynda onyń qarajaty esebinen júzege asyrylady. Elektromobıl onyń ornalasqan jerinde ornatylǵan bazalyq zarádtaý stansıasynan zarádtalady.