InfoHub Logo

Alla saqtasyn dep sóıleıik. Tis aýyrǵandy dos túgili dushpanymnyń basyna tilemes edim. Tipti “Qazir seniń janyńdy alamyn!” dep turǵan janalǵyshqa da tileıtin aýrý emes eken.

“Qaı jeriń aýyrsa — janyń sol jerde” dep qazaq bosqa aıtady. Tisiń men ishiń qatar aýyrsynshy, sonda biler ediń janyńnyń qaı jerde ekenin. İshiń aýyrsa, ájethanaǵa barasyń da qutylasyń… Al tisiń aýyrsa, qaıda barasyń?

Ómiri tisime et turyp kórmep edi, bir keshte aıaq astynan azý tisim qaqsap ala jóneldi. Úıde jalǵyzbyn, aıaıtyn áıel tórkindep ketkeli tórt kún bolǵan. Búgin kep qala ma dep, bolashaqqa “úmitpen” qaraımyn. Bastapqyda sabyrly edim, qoıar emes, áketip barady. Atyp turyp, úıdi kezip kettim. Sol jaqqa qısaıǵan basty qos qoldap demep, bir qalypty tepeńmen zyrqyrap júrmin. Barmaǵan burysh, kirmegen tesik qalmady. Aıdap otyryp vanaǵa kirem de, atyp shyǵyp kýhnáǵa baramyn, stoldy úsh aınalyp zalǵa kirem. Ondaǵy qýys-qýysty túgendep, jatyn bólmege tartam. Tis basylar emes. Aýyrǵany odan saıyn údep bara ma qaıtedi? Aqyryn eńkeıip edim, biraz basylǵan sıaqty boldy. Endi eńkeıe enteleı júrip, manaǵy “marshrýtty” 10 aınalyp óttim, bolmaıdy. Sekirip stoldyń ústine shyǵyp, shıfonerdiń ústine shyntaqtaı jatyp biraz tynystadym. Bolmaıdy, basylmaıdy. Sekirip túsip shkafka basymdy tyǵyp aldym. Endi júgiriske ún qosyldy. (Abyroı bolǵanda úıde uldar joq, kanıkýlǵa aýylǵa ketken). Ún bolǵanda qandaı, ún-zar, dersiń. A,a,a,a,a. O,o,o,o. Ý,ý,ý,ý,ý. Alla-aı, Alla-aı, m,m,m,m,m, ı,ı,ı,ı — mine meniń únzarym. Eńkeńdep otyryp holodılnıkti ashyp jiberip bir ýys muzdy opyryp ap qarsh-qarsh shaınap jiberdim, bolmaıdy. Endi birazdan soń, osy eńkeıgen kúıime de zar bolyp qaldym, eńbekteýge aınaldym. “Apyr-aý, boıym jer tartyp bara ma” dep te oıladym. İlýli turǵan atamnyń tashpıǵyn alyp basymnan úsh aınaldyrdym da, moınyma ilip aldym, moınymnan sypyryp jaǵyma bastym. Tis basylar emes, áketip barady. Tashpıhtyń toqsan toǵyz tasyn ýystap duǵa da oqydym. Tipti tashpıhty ýystap aýzyma da salyp aldym. “Alla, bar bolsań qaıdasyń?” dep zar ıleımin.

Bas jerde, tońqańdap iz kesken ıisshil tazydaı súzip júrmin, zarlap júrmin. (Kúlme, shyn sózim).

Súzip kelip, kire beristegi aıaqkıimder polkasyn taptym. Bul men tintpegen tyń meken, jańa obekt. Óz báteńkemdi jazbaı tanydym. Sol-sol-aq eken, tisimniń aýyrǵany sap tyıyldy. Oı, Alla-aı, tipti jazylyp ketti. Biraz jatyp endi basymdy kótereıin desem, syrqyraı jóneldi. Mańdaıymdy taǵy da edenge taq etkizip em, basyla qaldy. O, ǵalamat, bul ne? Edennen basymdy kótermeı spalnyıǵa jyljysam, taǵy bastaıdy qaqsap.

Ne de bolsa meniń janymdy saqtaıtyn osy burysh, osy núkte boldy. Moıny talyp, jelige moıyǵan tentek qulyndaı shekemnen shanshyla turalap jatyp qalǵyp barady ekem, esik qońyraýy shar ete qaldy.

— Óziń ash! — dep aıqaı saldym.

Shaqur-shuqyr esik ashylyp, áıelim kirgenin bildim, túrin kórmesem de, qandaı kúıde ekenin sezip jatyrmyn.

— Iá, burynǵyń basqasha edi, mynaýyńdy ne deımiz? — dedi syzdanyp.

— Muny ma, muny tońqaıyp jatyp tis emdeýdiń jańa tásili deımiz, — dedim men de qıastanyp.

Ol eńkeıip, aýzymdy ıiskedi de, bóten ıis bolmaǵan soń:

— Óı, ne boldy saǵan, ne kórindi, álde tyshqan ańdyp jatyrsyń ba? — dep ol da qısyq suraq qoıdy.

— Tyńda! — dedim de, hannyń aldynda tórttaǵandaı janyma saýǵa suraǵan jazalydaı, bar mán-jaıdy aıtyp berdim.

— Endi ne isteımiz? (Kúlip turǵanyn sezdim).

— Erteń baryp juldyryp tastaımyn, qazir arqama birdeńe japshy, — dep em, kelinshegim ishek-silesi qatyp kúlip aldy.

— Áý, sen osy jerde túnemeksiń be?

— Endi qaıtem, túneımin! — dedim.

Ol sylqyldaǵan kúıi arǵy bólmeden eski jalbaǵaı tonymdy ákep, tońqaıyp jatqan meniń arqama jaba saldy.

— Shaı ish, — dep tabalaı mazaqtap, kýhnáǵa ketti.

Jynym qaınap:

— Áı, esekke de jabýdy bulaı jappas, qymtasaıshy kishkene, dep aqyryp jiberdim. (Ol ishi túıilip kýhnádan shyǵa almaı qaldy).

Ne kerek, kórer tańdy esiktiń kózinde atyryp, tań ata basymdy qolyma alyp zymyrap polıklınıkaǵa tarttym. Bógelek qaqqan jylqydaı basty shulǵı zarlaǵan kúıi dárigerdiń aldynan bir-aq shyqtym. Vrash jalǵyz eken.

— Qaıda otyraıyn?

— Mynda. Kresloǵa… Azý ma?

— Azý.

— Nesheý?

— Bilmeımin, sol jaqtyń bárin jul! — dedim.

Dáriger qarap jiberip:

— Vosmoı, ýdalıt.

— Kóndik.

Byrt-byrt etip eki ýkol ketti.

— Shestmınýt podojdıte...

Alty mınóti alty jylǵy jazalaýshy katorgydaı ótti-aý áıteýir. Ýkol tarady, aýyz qaldy daladaı bop, astyńǵy erin men jaq bólek te, bas basqa bireýdiki sekildi. Yrbıyp otyrmyn, kómeı qaıda, til qaıda, belgisiz. Qysqyshy men tisteýigin qatar aýzyma jaqyndatqanda baıqadym: dárigerdiń qoly Qobylandynyń qolyndaı dáý eken. Myna qoldar tis julatyn emes, bas julatyn qoldar ma dersiń.

— A, a, a, a, a ,a.

— Tıho, tıho…

Jylqynyń ury tisin egegendeı aýyzǵa kergishti qoıyp, kirisip ketti. Aýyz aýyz emes, dala sıaqty, ishinde eki-úsh jigit tas qoparyp jatqandaı. Tisteýigi tisimdi myqtap qapty ǵoı deımin, qazan basymdy moınymmen qosa yrǵap-yrǵap, syqyrlata julyp alǵanda, astyńǵy jaǵym dárigerdiń qolynda ketkendeı boldy.

— Vse, vse, — dep dáriger, bir túkirtip aldy da, qazannyń ishin tazalaǵandaı julynǵan tistiń ornyn tazalap, barmaqtaı maqtany tistetti de:

— Myń teńge! — dedi.

Bastan qulaq sadaqa, neshe teńge bolsa da aıaıyn dep turǵan men joq. Myń teńgemdi usyndym da: myń vahmet — myń voolǵyr, — dep jónime kettim.

---