InfoHub Logo

Tótenshe jaǵdaılar mınıstrligi áleýmettik jelide qyzý talqylanǵan Tesla Cybertruck kóligine qatysty resmı túsinik berdi. Vedomstvonyń habarlaýynsha, elektromobıl Almatynyń taýly aımaqtarynda qutqarý jumystaryna paıdalanylady.

Bul týraly Infohub.kz aqparat agenttigi habarlaıdy.

Byltyr jyl sońynda TJM belgisi bar Tesla Cybertruck kóliginiń vıdeosy áleýmettik jelide tarap, kópshiliktiń tańdanysyn týdyrǵan edi. Jeli qoldanýshylary bul kóliktiń qandaı maqsatta qoldanylatynyn bilmeı, túrli boljam jasaǵan.

Qutqarý jumystaryna daıyndyq

Mınıstrlik Tengrinews.kz resmı saýalyna bergen jaýabynda materıaldyq-tehnıkalyq bazany júıeli túrde jańartyp, «zamanaýı qutqarý tehnıkasynyń úlgilerin» zerttep jatqanyn túsindirdi.

Elektromobıl eń aldymen shaqyrtýlar jıi túsetin Almatynyń taýly aımaqtary men oǵan irgeles jatqan aýmaqtarda qoldanylady dep josparlanǵan. Bul, ásirese, ár mınýt mańyzdy sanalatyn qıyn sátterde bólimshelerdiń jaýyngerlik ázirligi men áreket etý jyldamdyǵyna tikeleı áser etedi.

Vedomstvonyń málimetinshe, mundaı kólik qutqarý bólimshelerin oqıǵa ornyna jedel jetkizý, tabıǵı jáne tehnogendik sıpattaǵy tótenshe jaǵdaılarǵa den qoıý, apattyq-qutqarý jumystaryn júrgizý jáne zardap shekkenderdi, sonyń ishinde shuǵyl medısınalyq kómekke muqtaj týrıserdi evakýasıalaý úshin paıdalanylmaq.