InfoHub Logo

Amerıkalyq "Variety" basylymynyń málimetinshe, Paramount Pictures stýdıasy "Top Gan 3" ("Lýchshıı strelok 3") fılmin ázirleýde. Bul jobaǵa Tom Krýz oralyp, onyń prodúseri retinde Djerrı Brýkhaımer jumys isteıdi.

Bul týraly Infohub.kz aqparat agenttigi habarlaıdy.

Tom Krýz 2025 jyldyń mamyr aıynda úshinshi bólimniń ázirlenip jatqanyn rastaǵan bolatyn. Sol kezde komanda birneshe sújet nusqasyn qarastyryp jatqany aıtylǵan edi.

"Top Gan" tarıhy

"Top Gan" – 1986 jyly shyqqan kúlttik amerıkandyq fılm. Fılmde áskerı-áýe kúshteriniń úzdik ushqyshtaryn daıarlaıtyn mekteptegi oqıǵalar baıandalady. Basty keıipker – ushqysh Pıt "Meverık" Mıchell rólin Tom Krýz somdady.

Fılmde áýedegi shaıqastar, keıipkerlerdiń jeke ómiri, básekelestik jáne mahabbat jelisi qamtylǵan. 2022 jyly shyqqan "Top Gan: Meverık" jalǵas fılmi sol jyly eń tabysty týyndylardyń biri boldy. Onda Tom Krýz jas ushqyshtarǵa tálimger rólin atqardy.

Tom Krýz týraly

Tom Krýz – Gollıvýdtyń eń tanymal akterleriniń biri. Ol "Jańbyrly adam", "Djerrı Magýaıer" sıaqty kóptegen fılmderde oınaǵan. "Mısıa nevypolnıma" kınoepopeıasy arqyly da keńinen tanymal. Akter kóptegen marapattarǵa ıe bolǵan. Ol bıyl shildede 64 jasqa tolady.

2026 jyldyń qazan aıynda "Dıgger" fılminiń premerasy ótedi dep kútilýde. Bul týyndyda da Tom Krýz basty rólde bolady. Fılmniń rejıseri – Alehandro Gonsales Inárrıtý.