InfoHub Logo

Áke men shesheden jastaı aırylǵan eki bala baıdyń qozysyn jaıyp, tezegin terip, qalǵan-qutqanyn jep, eskisin kıip kún kóredi. Halyq aýzyndaǵy qaı dastan, qaı áńgime-ańyzda bolsyn baılar qatygez bolady. Olar úshin bir balanyń qarny ashyp, kıimi jyrtylyp, kóz jasynyń sel bop aǵýy bir toqtynyń mańyraǵanyndaı áser etpegen. Kerisinshe, toqty-serkesh mańyrasa, júregine shanshý bop qadalyp, qolyna qamshy ustatqan. Eki jetim de baıdyń osy qatygezdigin kórip jigeri qum bop ósedi. Óli taıaq órshil júrekti ókpedeı ezip, jas ómirdi jasyq ómirge aınaldyrady.

Shildeniń aptap ystyǵynda baıdyń aýyly kóshedi. Baıaǵy ádetimen baı eki jetimge qozyny taǵy da jaıaý aıdatady. Kósh jetken kúndik jolda qozy aıdaǵan eki bala ábden sharshaıdy. Eresegi býyny quryp, tabany taýsylǵanyn inisine bildirmese de, inisi sharshaǵanyn jasyra almaıdy. Shólden dińkesi quryǵan kishisi qozy aıdaǵan aǵasyna ilese almaı jylaıdy, jylap kele jatyp «toqta baıaý», «toqta baıaý», — dep jalynady. Balanyń sol jalynyshyn sybyzǵyshy sybyzǵyda osylaı tartqan eken.

 

---