InfoHub Logo

Tanymal aktrısa ári prodúser Quralaı Anarbekova jýrnalıs Dına Tólepbergenge bergen suhbatynda qazaqstandyq shoý-bıznestegi kópshilik bile bermeıtin tyń málimetterdi jaıyp saldy.

Bul týraly Infohub.kz aqparat agenttigi habarlaıdy.

Mansap úshin jasalǵan usynystar

Óner ıesiniń aıtýynsha, bul salada mansap jolynda túrli jaǵymsyz usynystarǵa tap bolatyn jaǵdaılar jıi kezdesedi. Anarbekova ózine de sondaı usynys jasalǵanyn moıyndady.

«Qorlan» rólinen keıin rejıserler ony basty rólderge kastıngsiz-aq shaqyrady dep oılaǵanyn aıtqan aktrısa, bir kastıng kezinde kútpegen jaǵdaıǵa tap bolǵanyn jetkizdi.

«Shokoladty usynys»

«Bir rejıser keshke birge kezdesip, sharap iship, kóńil kóterýdi usyndy. Onyń otbasy bar ekenin, jasy úlken adam ekenin bile tura mundaı usynys jasaýy meniń namysyma tıdi. Bul usynysty men shok retinde qabyldadym. Batystyń qyzy bolǵan soń, óte dóreki jaýap berdim», – dep bólisti Anarbekova.

Mańyzdy sheshimge sebep bolǵan oqıǵa

Aktrısa mundaı jaǵdaıdan keıin kóp oılanǵanyn aıtyp, dál sol oqıǵanyń ómirindegi mańyzdy sheshimderdiń birine sebep bolǵanyn atap ótti.

«Sol kezde aktrısanyń ǵumyry qysqa ma degen oı keldi. Sondyqtan ózimdi damytý kerektigin túsindim. Rejıserdiń ústinen qaraıtyn adam – prodúser. Sodan keıin qaıdan bilim alsam bolady dep oılanyp, Máskeýge baryp oqýǵa sheshim qabyldadym», – deıdi ol.

Máskeýde bilim alyp, elge oralǵannan keıin de saladaǵy jaǵdaıdyń tolyq ózgermegenin baıqaǵanyn aıtqan óner ıesi, sol bir jaǵymsyz usynystyń onyń prodúserlik joldy tańdaýyna túrtki bolǵanyn jasyrmady.

«Eger sol jaǵdaı bolmaǵanda, bálkim, men prodúser de bolmas edim», – dep túıindedi sózin Quralaı Anarbekova.