InfoHub Logo

AQSH prezıdenti Donald Tramp Ýkraına prezıdenti Vladımır Zelenskııdi Reseımen kelissózderdegi «tamasha múmkindikti» jiberip almaý úshin tez áreket etýge shaqyrdy. Bul týraly ol juma kúni, 13 aqpanda jýrnalıserge málimdedi.

Aq úıdiń X áleýmettik jelisindegi resmı paraqshasynda jarıalanǵan brıfıń úzindilerinde Tramp: «Zelenskıı áreket etýge tıis. Reseı kelisim jasaǵysy keledi, al Zelenskıı áreket etýi kerek – áıtpese ol tamasha múmkindikti jiberip alady. Ol áreket etýi kerek», - dedi.

Buǵan deıin Zelenskıı The Atlantic jýrnalyna bergen suhbatynda «jaman beıbitshilikke» qaraǵanda soǵysty jalǵastyrýdy jón kóretinin aıtqan bolatyn. Ýkraına prezıdenti eger óz halqyn jaman kelisimge kóndirýge májbúr bolsa, kelisimnen múldem bas tartatynyn atap ótti. Ol tolyq aýqymdy soǵystyń tórt jylynan keıin kúresti jalǵastyrýǵa daıyn ekenin aıtyp sendirdi. Prezıdent maıdandaǵy jaǵdaıǵa qatysty pikir bildire otyryp, Ýkraına jeńilmeıtinin málimdedi.

Ýkraına basshysy sondaı-aq, eger Tramp óziniń beıbitshilik ornatýshy repýtasıasyn nyǵaıtyp, Kongres aralyq saılaýdaǵy jeńis múmkindigin arttyrǵysy kelse, osy sátti paıdalanyp, Ýkraınadaǵy soǵysty toqtatýy kerektigin aıtty.

Aıta keteıik, Ýkraına, Reseı jáne AQSH delegasıalarynyń kezekti kelissózderi 17-18 aqpanda Jenevada ótedi dep josparlanǵan. Politico basylymynyń habarlaýynsha, amerıkandyq tarap bul kezdesýde ilgerileýshilikke qol jetkizýdi kútedi. Degenmen, basty kedergi aýmaqtyq másele bolyp qala beredi.