InfoHub Logo

Túrkistan qalasy Qazaqstannyń rýhanı ári mádenı ortalyǵy retinde erekshe mártebege ıe boldy. Memleket basshysy Qasym-Jomart Toqaev qol qoıǵan «Túrkistan qalasynyń erekshe mártebesi týraly» zań óńirdiń damýyna tyń serpin bermek. Bul týraly infohub.kz aqparat agenttigi habarlaıdy.

Osyǵan baılanysty oblys ákiminiń birinshi orynbasary Zulpyhar Joldasov tıisti sala ókilderimen kezdesip, zań aıasyndaǵy bastamalardy júzege asyrý joldaryn talqylady. Jıynda qaladaǵy tarıhı muralardy saqtaý, ınfraqurylymdy jaqsartý, týrızmdi damytý jáne halyqaralyq tájirıbeni engizý máseleleri qaraldy.

Tarıhı mura men týrızmdi damytý

Túrkistan – ejelgi Jibek jolynyń boıynda ornalasqan, qazaq halqy úshin qasıetti qala. Kezdesýde Qoja Ahmet Iasaýı kesenesi men ózge de tarıhı-mádenı eskertkishterdi qorǵaý, arheologıalyq jáne ǵylymı-restavrasıalyq jumystardy júrgizý máseleleri kóterildi.

Týrızm salasyn jandandyrý úshin qalanyń ınfraqurylymyn jetildirý mańyzdy. Onyń ishinde ınklúzıvti týrızm men múgedektigi bar azamattarǵa qolaıly jaǵdaı jasaý jospary qarastyryldy. Bul Túrkistanǵa keletin týrıserdiń sanyn arttyrýǵa jáne qalanyń halyqaralyq deńgeıdegi týrısik ortalyqqa aınalýyna yqpal etedi.

Jańa tehnologıalar men ınfraqurylym

Qalada biregeı dızaın kody engizilip, tarıhı murajaılar jańa qundy eksponattarmen tolyqtyrylady. Sonymen qatar, týrıser úshin QR-kody bar arnaıy kartalar qoldanysqa enbek. Bul júıe qalanyń kórikti jerleri týraly aqparatty jyldam ári yńǵaıly túrde alýǵa múmkindik beredi.

Budan bólek, zamanaýı aqparattyq tehnologıalar engizilip, «Aqyldy qala» jobasy aıasynda Túrkistannyń ınfraqurylymy jetildirilmek. Bul turǵyndardyń ómir sapasyn jaqsartýǵa jáne týrıser úshin yńǵaıly jaǵdaı jasaýǵa baǵyttalǵan.

Halyqaralyq tájirıbe jáne gıdterdiń biliktiligin arttyrý

Túrkistannyń týrısik áleýetin kóterý maqsatynda gıdterdi halyqaralyq deńgeıde oqytý baǵdarlamalary qolǵa alynady. Bul bastama «Vızıt ortalyǵy» qyzmetiniń sapasyn jaqsartyp, qalaǵa kelgen týrıserge joǵary deńgeıde qyzmet kórsetýge múmkindik beredi.

Sonymen qatar, Túrkistanda iri halyqaralyq is-sharalar men mádenı festıválder uıymdastyrý josparlanyp otyr. Bul álemniń túkpir-túkpirinen týrıserdi tartýǵa jáne qala ekonomıkasyn damytýǵa septigin tıgizbek.

Túrki áleminiń mádenı ortalyǵy

Osy bastamalar Túrkistandy tek Qazaqstannyń ǵana emes, búkil túrki áleminiń mádenı ári týrısik ortalyǵy retinde damytýǵa baǵyttalǵan. Qalanyń erekshe mártebesi onyń ınvestısıalyq tartymdylyǵyn arttyryp, jańa jumys oryndarynyń ashylýyna múmkindik beredi.

Bolashaqta Túrkistan – tarıh pen zamanaýı tehnologıalar úılesim tapqan iri mádenı-týrıstik ortalyqqa aınalmaq.