InfoHub Logo

Kórgen túsin jorytyp, onyń oryndalýyn taǵatsyzdana kútetinder bar. Yrymshyl bizder úshin bul jaǵdaı tańsyq emes. Kerisinshe, kórgen túsin eleýsiz qaldyryp, búgingimen ómir súretin adamdar da az emes. Tómendegi birneshe mysal "tús - túlkiniń boǵy" ekendigin ǵylymı turǵydan dáleldeıdi. Eger túsińizde nebir oqıǵalardyń kýási bolyp, óńińizde óz kózińizge ózińiz senbeı júrseńiz, naqty saldaryn maqaladan bile alasyz.

Adam uıyqtaǵan kezde mı jasýshalarynyń barlyǵy derlik "uıqyǵa" kete qoımaıdy, keıbir bólimderi qyzý jumys isteıdi. Osy bólikter arqyly biz buryn kórgen, estigen, dámin tatqan zattardyń beıneleri mıda qaıtadan "tiriledi". Ári uıqydaǵy adamnyń mıy jartylaı  tejelýge ushyraıtyndyqtan, oılaý dárejesi tómendep, túste nebir aqylǵa syıymsyz obrazdar beınelenedi.

Adamnyń kúndiz basynan keshken oqıǵalary, tilegi men armany, ózgelermen qarym-qatynasy, kúndelikti qyzmeti syndy áreketter tús kórýge birden-bir sebep. Fızıologıalyq turǵyda mı jasýshalaryna kez kelgen qımyl-qozǵalys (aǵash japyraǵynyń syldyry, qońyraý syńǵyry, áteshtiń shaqyrǵany, esiktiń ashylǵany), tipti uıaly telefondaǵy vıbrasıa da áser etedi. Aǵzańyzda (júrek, asqazan) jaısyzdyqtyń oryn alýy da túsińizge qaı-qaıdaǵy "keremetterdi" kirgizedi. Máselen, uıqydaǵy adamnyń júregine salmaq tússe, kenetten qatty soǵa bastaıdy. Túsińizde bireýmen tóbelesip, ıakı qashyp júrseńiz nemese aqshańyzdy joǵaltyp sabylýyńyz da júrek soǵysynyń áserinen eken. Sol sebepti, "óńimde aqsham joǵalady-aý" dep qorqýdyń esh qajeti joq.

Ómirde estimegen, kórmegen dúnıelerdiń túske kirmeıtindigi dáleldeýdi qajet etpeıtin aksıoma: týǵannan kórý qabiletinen aıyrylǵan adamnyń túsine kózge kórinetin beıneler kirmeıdi, esesine ıis, estý, dám arqyly qabyldanǵan nárseleri enetin kórinedi.

Qatty sharshap, qalǵyp ketkende, jartastan nemese bıikten qulap bara jatqandaı kúı keship, ózdigińizden shoshyp oıanatyn kezder de bolady. Sebebi, adam klınıkalyq ólimge ushyrap ketýi yqtımal bolsa, mıdan sıgnal beriledi. Sol kezde qorqynyshty tús kórgendeı shoshyp oıanyp, qaıtadan tátti uıqyǵa ketesiz. Osyndaı jaǵdaı jıi qaıtalansa, "perishtem qaqty" dep esepteńiz.

"Ittiń túsine súıek kirse, saýdagerdiń túsine aqsha kiredi". Túsińiz shynaıy ómirde oryndalyp, qýanyshqa kenelýińiz, ıakı oryndalmaı armanda ketýińiz de ǵajap emes. Sol sebepti shynaıy ǵumyr kesheıik!

Túnniń tynyshyn, tústiń durysyn bersin!

 Araı JUMATAI 

---