InfoHub Logo

Marqum Sherzat Bolattyń ólimine baılanysty 23 jylǵa bas bostandyǵynan aıyrylǵan Shynasyl Abzaldyń anasy Aqbota Esbergenova ulynyń sotynan keıingi aýyr jaǵdaıyn baıandady. Ol «El daýysy» baǵdarlamasyna bergen suhbatynda sot sheshimi men óz otbasynyń qazirgi kúıi týraly jan tebirenterlik sóz qozǵady.

— Jaǵdaıymyz óte qıyn. Balama tym kóp jyl berdi. Óz jasaǵanyn moıyndap, jazasyn alýǵa daıyn ekenin aıtty. Biraq 23 jyl degen — óte aýyr úkim. 15 jyl berse de jetkilikti edi. Qazir 60 mıllıon teńge talap etip otyr, al meniń úıim de, tabysym da joq. Osy sot prosesiniń ózinde qatty qınalyp qaldyq. Eki aı boıy Taldyqorǵan men úıdiń arasynda shapqylap júrip, jumyssyz da qaldym, — deıdi kózine jas alǵan ana.

Aqbota Esbergenovanyń aıtýynsha, sot ádiletti sheshim qabyldaýy kerek, biraq jazanyń sheginen shyǵýy kóp nárseni kúıretip ketken. Otbasyndaǵy jalǵyz asyraýshydan aıyrylý — olar úshin aýyr soqqy boldy.

— Ulym istegen isine ókinip otyr. Sotta ashyq aıtyp berdi. Biz eshteńeden qashqan joqpyz. Biraq jaǵdaıymyzdy da eskerse eken deımiz, — deıdi ol.

Bul — tek bir otbasynyń emes, jazalaý men áleýmettik qoldaýdyń tepe-teńdigi jaıly qoǵamǵa tastalǵan úlken suraq.