InfoHub Logo

Qazaqstan Premer-mınıstri Oljas Bektenovtiń tóraǵalyǵymen ótken Úkimet otyrysynda energetıka ınfraqurylymyn jańǵyrtý jáne aldaǵy jylytý maýsymyna daıyndyq máseleleri qaraldy. Otyrys barysynda ótken jylytý kezeńiniń qorytyndylary men aldaǵy maýsymǵa daıyndyq barysy talqylanyp, energetıkalyq nysandar men jelilerdi jóndeýge jáne jańartýǵa Úkimet rezervinen 25 mıllıard teńgeden astam qarjy bólý týraly sheshim qabyldandy.

Bul týraly Infohub.kz aqparat agenttigi habarlaıdy.

Jylytý maýsymyna daıyndyq basty nazarda

Energetıka vıse-mınıstri Suńǵat Esimhanov, KEGOC kompanıasy basqarma tóraǵasy Nábı Aıtjanov, «Samuryq-Energo» basqarma tóraǵasy Qaırat Maqsutov, sondaı-aq Qaraǵandy, Mańǵystaý, Batys Qazaqstan jáne Jambyl oblystarynyń ákimderi baıandama jasady. Ótken jylytý maýsymynyń eshqandaı iri avarıasyz aıaqtalǵany atap ótildi. Elektr stansıalaryndaǵy tehnologıalyq buzýshylyqtardyń sany 15%-ǵa azaıǵan. Sonymen qatar, elektr energıasyn óndirýde tarıhı rekord ornatylyp, shamamen 17 myń MVt-qa jetken, bul ótken jylytý kezeńimen salystyrǵanda 7%-ǵa joǵary.

Infraqurylymdy jańǵyrtýǵa mol qarjy bólinýde

Premer-mınıstr energetıka ınfraqurylymy men komýnaldyq sharýashylyqty jańǵyrtýdyń mańyzdylyǵyn aıtyp, «Tarıfti ınvestısıaǵa aıyrbastaý» baǵdarlamasy aıasynda elektr stansıalaryn jóndeýge jáne jańǵyrtýǵa bıyl 384 mıllıard teńgege jýyq qarjy qarastyrylǵanyn málimdedi. Bul ótken jyldan 9%-ǵa artyq. Eldiń energetıka ınfraqurylymyn jańǵyrtý jónindegi ulttyq joba belsendi júzege asyrylýda. Bıyl 130 shaqyrym jylý jelisi men 10,5 myń shaqyrym elektrmen jabdyqtaý jelisin jańǵyrtý josparlanǵan. Bul jumystar atalǵan jelilerdiń tozýyn tıisinshe 48%-ǵa jáne 62%-ǵa deıin azaıtýǵa múmkindik beredi.

Jóndeý jumystaryn qarjylandyrýda kemshilikke jol berilmeýi tıis

Úkimet basshysy salalyq vedomstvolar men ákimdikterdiń nazaryn jóndeý jumystarynyń kólemin jáne olardy qarjylandyrýdy qysqartýǵa jol bermeý qajettigine aýdardy. Mundaı jaǵdaılar oryn alsa, menshik ıeleri men basqarýshy kompanıalarǵa qatysty sharalar qabyldanatyny eskertildi. KEGOC kompanıasyna jáne Energetıka mınıstrligine mamyrdyń 25-ine deıin ulttyq mańyzy bar stansıalar úshin jabdyqtardyń jumys rejımderin bekitý tapsyryldy.

Óńirlerdiń jaýapkershiligi

Óńirler aldaǵy jylytý maýsymyna sapaly ári ýaqtyly daıyndyqty qamtamasyz etýi tıis. Energıa kózderi men ınjenerlik jelilerdi jóndeý jáne jańǵyrtý jumystary josparly túrde, belgilengen merzimderde oryndalýy qajet. Jylý jelilerin synaýǵa erekshe nazar aýdarylýy kerek. Bólingen qarajattyń tıimdi paıdalanylýyn jáne jumystardyń ýaqtyly aıaqtalýyn qatań baqylaý qajettigin Premer-mınıstr atap ótti. Jylytý maýsymyna daıyndyq pasporttaryn almaǵan óńir ákimderi jeke jaýapkershilikke tartylady.

Qarjylandyrý jáne merzimder

Jetisý, Abaı, Aqmola jáne Shyǵys Qazaqstan oblystaryndaǵy nysandardy jańǵyrtýǵa jáne tórt óńirdegi 30 shaqyrymǵa jýyq jylý jelilerin jóndeýge 25 mıllıard teńgeden astam qarjy baǵyttalady. Ákimdikterge eki apta ishinde barlyq konkýrstyq rásimderdi ótkizip, jóndeý jumystaryn bastaý tapsyryldy. Jylýmen jabdyqtaý obektilerin jóndeý jumystary tamyz aıynyń sońyna deıin aıaqtalýy tıis. Bilim berý jáne densaýlyq saqtaý obektileri qyrkúıektiń 1-ine deıin, al soltústik, ortalyq jáne shyǵys óńirlerdegi ınjenerlik ınfraqurylym men turǵyn úı-kommýnaldyq sharýashylyq obektileri qyrkúıektiń 15-ine deıin, basqa óńirlerde qazannyń 15-ine deıin tolyq daıyn bolýy kerek. Ákimderge bul jaǵdaıdy únemi nysandarǵa baryp, jeke baqylaýda ustaý tapsyryldy.

Energetıka mınıstrligi, Kólik mınıstrligi jáne ákimdikterge qyrkúıektiń 1-ine deıin jylý kózderinde jáne tuıyqtarda otyn qoryn ýaqtyly jınaqtaýdy qamtamasyz etý tapsyryldy.