InfoHub Logo

Oqý-aǵartý mınıstri Asqat Aımaǵambetov kitap oqýdyń mańyzy týraly oılaryn bólisti.

«Balalyq shaǵymnan qalǵan estelikterdiń biri - úıdegi kitaptarǵa toly úlken sóreler men alýan túrli ádebıetter. Úıde kitaptardyń belgili bir serıasyna jazylý nemese kezekti ret oqylǵan kitaptar týraly sondaı maqtanyshpen, qyzyǵýshylyqpen aıtylǵany áli esimde. Osydan bolar men úıdegi kitaptardy oqyp shyǵyp, keıinirek aýdandyq kitaphananyń turaqty oqyrmany boldym. Bala kezimde «tamaq iship otyrǵanda kitap oqymaý kerek» degen eskertýdi jıi estıtinmin. Ózim áke atanǵanda balalaryma aldymen ertegi oqyp berdim, keıin úlken ulym ózi oqı bastady. Ertegiler men shaǵyn áńgimelerden bastap, shytyrman oqıǵalar, ǵylymı fantasıka jáne kórkem emes fantasıka syndy janrlarǵa birtindep kóshtik. 5-synyptan bastap ulym jylyna 30-50 kitap oqıtyn boldy. Sol kezde men de ulyma «tamaq iship otyrǵanda kitap oqymaý kerek» dep eskertý jasaı bastadym», - dep jazdy Asqat Aımaǵambetov Facebook paraqshasynda.

Aıtýynsha, mınıstrdiń balabaqshaǵa baryp júrgen kenje balasy da ertegilerdi, ásirese, «Erketaı» men «Jánibek» týraly zamanaýı qazaq komıksterin tyńdaǵandy unatady.

«Men óz tájirıbemnen balalardy oqýǵa májbúrleýge bolmaıtynyn aıta alamyn. Balalarǵa qysym kórsetpeı, kerisinshe jeke mysalmen oqýǵa degen súıispenshilikti oıatý qajet. Bala ata-anasynyń kitap oqyp otyrǵanyn kórýi kerek. Sonda ǵana qyzyǵýshylyq paıda bolady. Kitaptar balanyń minezine jáne qundylyqtarynyń qalyptasýyna áser etetinin de eskergen jón. Oń sújettik jelisi bar kitaptar jaqsy ádetterge baýlyp, durys tárbıe beredi. Sol sebepti balalardy qoldaý, kitap oqýǵa baýlý, olarǵa kitap satyp alyp berý, kitap kórmelerine birge barý óte mańyzdy. Buǵan deıin PISA, TIMSS halyqaralyq zertteýleriniń nátıjelerin jarıalaǵan bolatynbyz. Olar ata-analardyń balalarmen birge oqýy jáne olardyń bolashaqta mekteptegi akademıalyq úlgerimi arasyndaǵy naqty jáne oń baılanysty kórsetti. Zertteý nátıjesine sáıkes, úıde kitaptary bar balalar joǵary nátıje kórsetken. Sondyqtan 2020 jyly oqýshylardy kórkem ádebıet oqýǵa baýlý úshin aýqymdy respýblıkalyq «Oqýǵa qushtar mektep» jobasyn iske qostyq. Bul joba týraly kelesi jazbamda keńirek tarqatyp aıtamyn. Mereke qarsańynda osy jazbany oqıtyn ata-analarǵa balalarǵa qyzyqty kitap oqýǵa keńes berýdi usynar edim. Olardyń kitap álemine jasaǵan saıahaty qyzyqty bolsyn. Barlyq oqýshyny kitap oqýǵa kóbirek ýaqyt bólýge shaqyramyn. Óıtkeni, bilim – eń qundy baılyq», - dep túıindeıdi mınıstr.

---