InfoHub Logo

Qazaqstan Respýblıkasynyń Ulttyq banki 2026 jyldyń birinshi jartyjyldyǵynyń sońyna deıin aqsha-kredıt saıasatynyń aǵymdaǵy jaǵdaıyn, sonyń ishinde bazalyq mólsherlemeni ózgerissiz qaldyrýdy kózdep otyr. Bul shara ınflásıany tejeýge baǵyttalǵan.

Ulttyq bank baspasóz qyzmetiniń habarlaýynsha, ekonomıkaǵa áser etetin negizgi faktorlar qatarynda ishki ınflásıalyq táýekelder, kvazıfıskaldyq yntalandyrýdyń yqtımal saldary, komýnaldyq qyzmetter men janar-jaǵarmaı baǵasynyń ósýi bar. Sondaı-aq, salyq reformasynyń, ásirese QQS stavkasyn arttyrý jáne salyq tóleýshiler aýqymyn keńeıtý boıynsha sharalardyń iske asyrylýyna qatysty belgisizdik saqtalýda.

Bıznestiń bul ózgeristerge qalaı beıimdeletinin aldaǵy toqsandarda baqylaý mańyzdy bolady. Osy faktorlardyń ekonomıkaǵa qysymyn azaıtý úshin retteýshi organ 2026 jyldyń birinshi jartyjyldyǵy boıy bazalyq mólsherlemeni qazirgi deńgeıde ustap turýdy josparlaıdy.

Inflásıany 2027 jylǵa deıin tómendetý

Ulttyq bank boljamy boıynsha, 2026 jyly ınflásıa 9,5–12,5 paıyzdy qurasa, 2027 jyly 5,5–7,5 paıyzǵa deıin tómendeýi tıis. Regýlátordyń basty mindeti – ınflásıany orta merzimdi 5 paıyzdyq maqsatty deńgeıge turaqty túrde jetkizý. Bul úshin 2026 jyldyń birinshi jartyjyldyǵynyń sońyna deıin aǵymdaǵy aqsha-kredıt sharttaryn saqtaý josparlanýda.

Ulttyq bank derekterine súıensek, ınflásıaǵa turǵyn úı-kommýnaldyq sharýashylyǵy tarıfteriniń reformasy, janar-jaǵarmaı baǵasyn yryqtandyrý, aýqymdy kvazıfıskaldyq yntalandyrý, salyq-búdjet ózgeristeri jáne ekonomıkalyq agentterdiń kútýleri aıtarlyqtaı áser etedi. Bul faktorlar tek paıyzdyq mólsherlememen tolyq beıtaraptandyrylmaıtyn ınflásıalyq qysym týdyrady, alaıda ol «qaıtalama áserlerdi tejeýde mańyzdy ról atqarady».

Sonymen qatar, úkimetpen birlesip memlekettik baǵaly qaǵazdardyń ishki naryǵy, kiristilik qısyǵy jáne memlekettik boryshty basqarý qurylymy damytylýda. Ulttyq bank búdjet shyǵyndary men ınvestısıalyq jobalardy baqylaýdy kúsheıtip, fıskaldyq jáne qarjylyq monıtorıń úshin sıfrlyq sheshimderdi engizýde. Bul sharalar monetarlyq emes ınflásıalyq táýekelderdi azaıtýǵa, ekonomıkalyq saıasatqa degen senimdi nyǵaıtýǵa jáne ekonomıkaǵa shamadan tys qysymsyz ınflásıanyń turaqty tómendeýine jaǵdaı jasaýǵa kómektesedi.

Inflásıalyq táýekelderge Ulttyq banktiń jaýaby

Ulttyq banktegilerdiń aıtýynsha, bazalyq mólsherlemege qatysty sheshimder ishki jáne syrtqy táýekelderdiń teńgerimin baǵalaý negizinde qabyldanady. «Bul bazalyq mólsherlemeni avtomatty túrde arttyrý týraly emes, táýekelderdiń teńgerimi ınflásıaǵa baǵyttalǵan jaqqa aýytqyǵan jaǵdaıda ýaqtyly áreket etýge daıyndyqty bildiredi», - delingen baspasóz qyzmetiniń habarlamasynda.

Qańtar aıyndaǵy bazalyq mólsherlemege qatysty sheshim kezinde ınflásıanyń baıaýlaýyn bekitý úshin aqsha-kredıt saıasatynyń aǵymdaǵy qatańdyǵyn birinshi jartyjyldyqta saqtaý nıeti týraly aıtylǵan bolatyn. Eger bul jetkiliksiz bolsa, «qosymsha qataıtý múmkindigi qarastyrylady».

«Ekonomıka ishindegi bar táýekelder men syrtqy ortadaǵy belgisizdik jaǵdaıynda ortalyq banktiń negizgi róli árbir jeke shokty boljaý emes, osyndaı ózgeristerge ekonomıkanyń tózimdiligin qamtamasyz etý bolyp tabylady. Bul úshin aqsha-kredıt saıasaty ıkemdi, boljamdy jáne ınflásıa boıynsha maqsatqa jetýge baǵyttalǵan bolýy tıis», - dep qorytyndylady Ulttyq bank.

Baǵalardyń turaqty tómendeý traektorıasynan aýytqyǵan jaǵdaıda, Ulttyq banktiń Aqsha-kredıt saıasaty komıteti ony túzetýdi qarastyrýy múmkin ekenin atap ótti.

Bul týraly Infohub.kz aqparat agenttigi habarlaıdy.