InfoHub Logo

Ata-analar kútken jaýap keldi: «Ulttyq qor – balalarǵa» baǵdarlamasy boıynsha 2025 jylǵy qarajat balalardyń maqsatty shottaryna 2026 jylǵy 1 aqpannan keshikpeı aýdarylady. Bul merzim ásirese 2026 jyly 18 jasqa tolatyndarǵa (2008 jyly týǵandar) mańyzdy, óıtkeni jınaqty zańda kórsetilgen maqsattarǵa tek kámeletke tolǵan soń paıdalanýǵa bolady.

Bul týraly Infohub.kz aqparat agenttigi habarlaıdy.

Naqty merzim: 1 aqpannan keshiktirilmeıdi

Biryńǵaı jınaqtaýshy zeınetaqy qory (BJZQ) resmı túsindirmesine sáıkes, 2025 jylǵa eseptelgen maqsatty aýdarymdar 2026 jylǵy 1 aqpanǵa deıin balalardyń BJZQ-daǵy maqsatty jınaq shottaryna túsedi. 2008 jyly týǵan qatysýshylarǵa da osy merzim qoldanylady.

Kimder qatysady

Qordyń málimetinshe, Qazaqstan azamattyǵy bar barlyq balalar baǵdarlamaǵa engizilgen. Qatysýshylar quramy 2025 jylǵy 31 jeltoqsandaǵy jaǵdaı boıynsha esepteledi. 2026 jyly 18 jasqa tolatyndar óz jınaqtaryn zańnamada belgilengen maqsattar úshin kámeletke tolǵan sátten bastap paıdalana alady.

Somalar men statısıka

Resmı derek boıynsha, 2024 jyly baǵdarlamaǵa 6 919 131 bala qatysyp, árqaısysyna 100,52 dollardan esepteldi. 2025 jyly qatysýshylar sany 6 921 035 balaǵa deıin ósip, bir balaǵa tıesili jyldyq esepteý 129,38 dollarǵa jetti.

Eki jyl qatarynan qatysqan balalardyń ortasha jınaǵy 232,94 dollardy qurady. Bul sandar jyl saıynǵy aýdarymnyń jáne qatysýshylar sanynyń birtindep artyp jatqanyn kórsetedi.

Qarajatty qalaı jáne qashan paıdalanýǵa bolady

Maqsatty jınaqtar BJZQ-daǵy arnaıy shottarǵa túsedi jáne olardy 18 jasqa tolǵannan keıin ǵana, Qazaqstan zańnamasynda belgilengen baǵyttarǵa (maqsatty paıdalanym) jumsaýǵa ruqsat. Qor qatysýshylarǵa tólem merzimin kútýdi jáne jeke kabınettegi shot kúıin tekserip otyrýdy usynady.