InfoHub Logo

Ulttyq qaýipsizdik komıteti (UQK) Shyǵys Qazaqstan oblysy ákiminiń birinshi orynbasary Jaqsylyq Omarǵa qatysty sotqa deıingi tergeý bastalǵanyn rastady.

Bul týraly Infohub.kz aqparat agenttigi habarlaıdy.

Ne boldy?

Aqparat 13 aqpanda jelide paıda boldy. Sol kezde oblystyq ákimdikte bul týraly málimet joq ekenin aıtqan. Sondaı-aq, ákimdikten «Orynbasar densaýlyǵyna baılanysty ýaqytsha demalys alǵan» dep habarlanǵan bolatyn.

Redaksıa tilshisi sheneýnikpen baılanysýǵa tyrysqanymen, ol qońyraýlarǵa jaýap bermedi.

UQK ne deıdi?

Al Ulttyq qaýipsizdik komıtetinen sheneýnikke qatysty tergeý bastalǵany týraly habarlandy:

«Sotqa deıingi tergeý júrgizilip jatyr. Qylmystyq-prosestik kodekstiń 201-babynyń 1-bóligine sáıkes, ózge aqparat jarıa etilmeıdi», – delingen vedomstvonyń resmı saýalǵa bergen jaýabynda.

Alaıda, UQK naqty qandaı aıyp taǵylǵanyn nemese Qylmystyq kodekstiń qaı baby boıynsha tergeý júrgizilip jatqanyn naqtylamady.

Jaqsylyq Omar týraly ne belgili?

Jaqsylyq Omar 1980 jyly 28 qyrkúıekte Almaty oblysy Alakól aýdanynyń Úsharal aýylynda dúnıege kelgen. Ol 2001 jyly Abaı atyndaǵy Almaty memlekettik ýnıversıtetin «geografıa» mamandyǵy boıynsha, 2010 jyly Qazaq gýmanıtarlyq-zańgerlik ınovasıalyq ýnıversıtetin «jergilikti jáne memlekettik basqarý» mamandyǵy boıynsha bitirgen. 2018 jyly Serikbaev atyndaǵy Shyǵys Qazaqstan memlekettik tehnıkalyq ýnıversıtetinde ekonomıka ǵylymdarynyń magıstri dárejesin alǵan.

Eńbek joly

2001-2005 jyldary Omar Mádenıet jáne aqparat mınıstrliginde jetekshi jáne bas maman bolyp jumys istedi. 2005-2007 jyldary Qarjy mınıstrliginde maman boldy.

2007-2009 jyldary «Qazaqstan» teleradıokorporasıasynyń aqparattyq-taldaý baǵdarlamalary dıreksıasy dırektorynyń orynbasary, sodan keıin «Arna medıa» holdıńiniń bas menedjeri qyzmetterin atqardy. 2009-2010 jyldary Shyǵys Qazaqstan oblysy ákiminiń kómekshisi bolyp jumys istedi. 2010-2011 jyldary SHQO ishki saıasat basqarmasyn basqardy. 2011-2013 jyldary SHQO mádenıet basqarmasyn basqardy. 2013-2016 jyldary Shyǵys Qazaqstan oblysy ákiminiń orynbasary qyzmetin atqardy. 2016-2018 jyldary Almaty oblysy ákiminiń orynbasary boldy.

Osydan keıin 2018-2024 jyldary Jaqsylyq Omar Óskemen qalasynyń ákimi qyzmetin atqardy. 2024 jyldan 2025 jyldyń 4 sáýirine deıin SHQO ákiminiń keńesshisi bolyp jumys istedi. 2025 jyldyń 7 sáýirinen bastap Shyǵys Qazaqstan oblysy ákiminiń birinshi orynbasary qyzmetin atqaryp keledi.