InfoHub Logo

Vengrıanyń premer-mınıstri Vıktor Orban el parlamentine ótken saılaýda jeńilis tapqanyn resmı túrde moıyndady. Bul týraly ol jeksenbi kúni keshke Býdapeshttegi jaqtastary aldynda sóılegen sózinde málimdedi.

Bul málimdemeden keıin Ulttyq saılaý komısıasynyń alǵashqy derekteri Eýropashyl konservatıvti opozısıalyq "Tısa" partıasynyń basymdyǵyn kórsetti.

"Saılaý nátıjeleri áli tolyq shyqpasa da, olar aıqyn. Bul bizge aýyr tıetin jáne túbegeıli nátıje: bizdi eldi basqarý múmkindiginen aıyrdy. Jeńimpaz partıany quttyqtadym", - dedi Orban.

Óz kezeginde "Tısa" partıasynyń jetekshisi Peter Madár Dýnaı jaǵalaýyndaǵy jıynda Orban úkimetiniń dereý otstavkaǵa ketýin talap etti.

"Tısa" partıasynyń jeńisi

Madárdyń aıtýynsha, onyń partıasy saılaýda aıqyn basymdyqpen jeńiske jetken. Ol parlamenttegi eki úshten bir bólik daýysqa ıe bolatynyna senimdi ekenin aıtyp, bul Vengrıany "qaıta iske qosýǵa" múmkindik beretinin atap ótti.

"Tısa" jáne Vengrıa saılaýda jeńdi. Úlken, óte úlken basymdyqpen. Parlamentte bizde eki úshten bir oryn bolady, bul bizge ońaı jáne beıbit transformasıany júzege asyrýǵa múmkindik beredi", - dedi Madár.

Ol sondaı-aq úkimet sheneýnikterin jańa bılikpen úılestirýdi surap, "Eger sheshim qabyldaǵylaryń kelse, meniń nómirimdi bilesińder, maǵan habarlasyp, aqyldasyńdar" dedi.

Saılaýdaǵy daýys sany

Daýys berýdiń 90 paıyzy sanalyp, Vengrıa parlamentine úsh partıa ótetini anyqtaldy: "Tısa", bıliktegi "Fıdes" jáne últraońshyl, Reseıshil "Mı Hazank" ("Bizdiń Otan").

Barlyq vengrıalyq BAQ-tyń esepteýleri boıynsha, "Tısa" partıasy konstıtýsıalyq basymdyqqa ıe bolady. Atap aıtqanda, Atlatszo basylymy "Tısa" 138 mandat, "Fıdes" 54, al "Mı Hazank" 7 mandat alatynyn boljap otyr. Vengrıa parlamentinde konstıtýsıalyq basymdyqqa ıe bolý úshin 133 daýys jetkilikti.

Bul týraly Infohub.kz aqparat agenttigi habarlaıdy.