InfoHub Logo

Qazaqstanda joǵary oqý oryndary sany tym kóp degen pikirler negizsiz. Bul týraly joǵary bilim berý júıesin damytý taqyrybyndaǵy dóńgelek ústelde Bilim jáne ǵylym vıse-mınıstri Asqat Aımaǵambetov málim etti.

«Bizdiń qoǵamda bilimge qatysty túrli ańyzdar aıtylyp júr. Qazaqstanda joǵary oqý oryndary tym kóp degen pikirler jıi kezdesedi. Bizde qazirgi kezde 130 JOO bar. Eger de halyqtyń jan basyna shaqsaq ári jalpy kólemge nazar aýdarsaq, onda Fransıada 500-den astam, AQSH-ta 5 myńǵa jýyq, al bizde 130. Bul turǵyda absalúttik kórsetkishterge emes,   halyqqa shaqqandaǵy koefısıentke qaraǵan abzal. Osy oraıda bizde joǵary oqý oryndary sonshalyqty kóp emes ekenin baıqaımyz.   Negizi, máseleniń máni sanda emes, sapada ekenin túsiný kerek», - dedi Asqat Aımaǵambetov.

Budan keıin ol elimizdegi stýdentter sanyna qatysty aıtylyp júrgen qaýesetterge toqtaldy.

«Taǵy bireýler bizde stýdentter tym kóp ekenin alǵa tartýda. Shyndyǵynda, elimizdegi stýdentter sany Ekonomıkalyq yntymaqtastyq jáne damý uıymy elderimen salystyrǵanda birneshe az. Kerisinshe búginde bizge osy baǵytty damytý kerektigin aıtýdamyz», - dep oıyn bildirdi vıse-mınıstr.

Sonymen qatar ol qazirgi kezde bilim salasyna shamadan artyq qarjy bólinip jatqandyǵy qoǵamda sóz bolǵandyǵyna toqtaldy.

«Naqtyraq aıtqanda, qarjy jalpy ishki ónimnen 3 paıyzdan sál astam deńgeıde bólinýde. Al eger joǵary bilimge toqtalsaq, onda onyń úlesi aıtarlyqtaı tómen. Sondyqtan qoǵamda kóterilip júrgen negizgi máselelerdi bilemiz jáne sol baǵyttarda jumystardy jalǵastyrýdamyz», - dedi mınıstrdiń orynbasary.

QazAqparat

---