InfoHub Logo

Almatydaǵy Ál-Farabı dańǵylynda bolǵan, úsh adamnyń ómirin qıǵan jol apatyna qatysty qylmystyq is qozǵaldy. Bul týraly 24 naýryzda Almaty qalalyq polısıa departamenti bastyǵynyń orynbasary, polısıa polkovnıgi Rýstam Sháribaev málimdedi.

Bul týraly Infohub.kz aqparat agenttigi habarlaıdy.

İstiń mán-jaıy

İs Qylmystyq kodekstiń 345-babynyń 4-bóligi boıynsha qozǵaldy. Bul bap boıynsha kinálige 10 jylǵa deıin bas bostandyǵynan aıyrý jazasy qarastyrylǵan.

Apat 24 naýryz kúni tańǵy saǵat 03:30 shamasynda boldy. Batysqa qaraı baǵyt alǵan Zeekr elektromobıli joǵary jyldamdyqpen qarsy jolaqqa shyǵyp, shyǵysqa qaraı kele jatqan Mercedes avtokóligimen soqtyǵysqan. Mercedes-tiń júrgizýshisi men eki jolaýshysy (biri 22, ekinshisi 20 jastaǵy qyzdar) oqıǵa ornynda kóz jumdy. Zeekr kóliginiń júrgizýshisi aman qalyp, jaraqat alǵandyqtan medısınalyq mekemege jetkizildi.

Polısıa tergeýde

Almaty qalalyq polısıa departamenti bastyǵynyń orynbasarynyń aıtýynsha, qazirgi ýaqytta kúdikti medısınalyq mekedede baqylaýda. Jaǵdaıy turaqtalǵannan keıin ýaqytsha ustaý ızolátoryna qamalatyn bolady.

«Apatqa qatysty barlyq tulǵalar anyqtaldy. Olardyń árqaısysyna qatysty ákimshilik is qozǵalyp, materıaldar sotqa jiberildi, kólikter aıyppul turaǵyna qoıyldy. Eshkim jaýapkershilikten qashpaıdy», - dedi Sháribaev.

Onyń aıtýynsha, barlyq beınebaqylaý kameralarynyń jazbalary, sonyń ishinde jekemenshik kameralardyń jazbalary da alynyp, is materıaldaryna qosylǵan. Qazirgi ýaqytta olar muqıat zerttelýde. Sonymen qatar, júrgizýshige alkogóldi paıdalaný boıynsha medısınalyq kýálandyrý taǵaıyndaldy. Nátıjeleri keıin habarlanady.

Polkovnık azamattardy jalǵan aqparat taratpaýǵa jáne tek resmı derekkózderge súıenýge shaqyrdy. «Zań boıynsha barlyq kináliler jaýapqa tartylady», - dep atap ótti ol.

Qoǵamdyq pikir

Jeli qoldanýshylary sońǵy birneshe kún boıy Ál-Farabı dańǵylyndaǵy jol apatyn belsendi talqylap jatyr. Qazirgi ýaqytta barlyq nazar Zeekr júrgizýshisiniń tulǵasyna aýdarylǵan. Keıbir suraqtarǵa áli kúnge deıin resmı organdar jaýap bergen joq.

Jelidegi keıbir pikirlerde bul apatty quqyq qorǵaý júıesi úshin synaq dep atap, qoǵamnyń «zań bárine birdeı» degen talapty qoıyp otyrǵany aıtylady. Ashyq sot prosesin talap etip, istiń jabyq esik artynda sheshilmeýin qalaıtyndaryn bildirýde.

Táýelsiz jýrnalıs Mıhaıl Kozachkovtyń aqparaty boıynsha, apat kezinde rúlde 32 jastaǵy, Almatynyń joǵary jaǵynda turatyn bıznesmen bolǵan. Onyń kólik tasymaly salasynda jumys isteıtin kompanıalary bar. Bir kompanıasy 2024 jyldyń kúzinen beri qazynaǵa 50 mıllıon teńgeden astam qarjy salǵan.

Kýágerlerdiń aıtýynsha, sol túni Zeekr kóligi basqa kólikpen jarysqa túsken.

Jýrnalıs apattyń kinálisi sot aldynda jaýap beretinine jáne 10 jylǵa bas bostandyǵynan aıyrylatynyna senim bildirdi.