InfoHub Logo

Qańtar aıynda Biryńǵaı jınaqtaýshy zeınetaqy qorynyń (BJZQ) ınvestısıalyq kirisi aıtarlyqtaı tómendep, bul qoǵamda úlken talqy týdyrdy. Ózderiniń zeınetaqy shotyndaǵy ózgeristerdi baıqap, qarjylyq jaǵdaıyna alańdaǵan azamattar túrli pikirler bildirýde. BAQ pen áleýmettik jelilerde "zeınetaqy qory shyǵynǵa batty", "mıllıardtar joq boldy" degen málimdemeler kóbeıdi.

Alaıda, Ulttyq bank bul jaǵdaıǵa túsinikteme berip, másele ýaqytsha ekenin málimdedi. Qańtar aıynda ınvestısıalyq kiris mınýs 285 mlrd teńgeni kórsetip, jalpy tabys deńgeıi 1,25%-ǵa tómendegen.

Zeınetaqy jınaqtary nege azaıdy?

Mamandar munyń úsh negizgi sebebin atap otyr:

1. Memlekettik baǵaly qaǵazdardyń arzandaýy
   Qańtarda Qarjy mınıstrligi oblıgasıalardy kóptep shyǵarǵanymen, olarǵa suranys az boldy. Bul baǵaly qaǵazdardyń naryqtyq qunyn tómendetip, BJZQ portfelindegi aktıvterge áser etti.

2. Ulttyq valútanyń nyǵaıýy
   Jyl basynda teńge dollarǵa shaqqanda birshama nyǵaıdy. Eger buryn 1 dollar 525,11 teńge bolsa, qańtardyń sońynda 518,14 teńgege deıin tústi. Bul ózgeris zeınetaqy qoryndaǵy sheteldik aktıvterdiń qunsyzdanýyna alyp keldi.

3. Halyqaralyq naryqtaǵy turaqsyzdyq
   Álemdik qarjy naryǵyndaǵy ózgerister de Qazaqstandaǵy zeınetaqy qorynyń ınvestısıalyq kórsetkishterine keri áserin tıgizdi.

Qarjy sarapshylary ne deıdi?

Ulttyq bank ókilderi men ekonomıserdiń aıtýynsha, bul – uzaq merzimdi ınvestısıalardyń qalypty qubylysy. Olar jınaqtyń ýaqytsha azaıýy qordyń tolyqtaı shyǵynǵa ushyraǵanyn bildirmeıdi deıdi. Mundaı jaǵdaı naryqtaǵy ózgeristerge baılanysty mezgil-mezgil qaıtalanyp turady. Sarapshylar zeınetaqy qarajatyn basqarý tıimdiligin 1-2 aı emes, keminde jyldyq kórsetkish boıynsha baǵalaý qajet ekenin aıtady.

Ulttyq bank aqpan aıynda da osy tendensıa jalǵasýy múmkin ekenin joqqa shyǵarmaıdy. Óıtkeni teńgeniń nyǵaıýy men memlekettik oblıgasıalar baǵasynyń tómendeýi áli de baıqalyp otyr.

Qysqa merzimdi ózgerister keıde negatıvti kórinýi múmkin, biraq qarjy mamandary zeınetaqy qory bankrotqa ushyrady nemese qarajat joǵaldy deýge negiz joq deıdi. Investısıalyq tabys jyl saıyn ózgerip otyrady, al qazirgi jaǵdaı ýaqytsha qubylys retinde qarastyrylýda.

BJZQ-daǵy qarajatyńyzdyń qozǵalysyn baqylaý mańyzdy, biraq naryqtyq aýytqýlarǵa baılanysty jalǵan úreıge boı aldyrýdyń qajeti joq. Uzaq merzimdi perspektıvada ınvestısıalyq tabys qaıta qalpyna keledi dep kútilýde.