InfoHub Logo

Ýkraına prezıdenti Vladımır Zelenskıı 1994 jylǵy jeltoqsanda eldiń ıadrolyq arsenalynan bas tartýyn «úlken qatelik» dep atady. Bul týraly ol brıtanıalyq jýrnalıser Alaster Kempbell men Rorı Stúart júrgizgen podkast barysynda málimdedi.

Bul týraly Infohub.kz aqparat agenttigi habarlaıdy.

Memleket basshysynyń aıtýynsha, Ýkraına ıadrolyq qarýdan bas tartqanda, basqa taraptardan ádil baǵa alýy tıis edi. Ol NATO-ǵa múshe bolýdy ıadrolyq arsenaldyń ornyna alýǵa bolatyn eń az nárse dep sanaıdy.

«Esh nárse almadyq»

«Ýkraına ıadrolyq qarýdan bas tartýǵa keliskende, ekinshi tarap tóleıtin baǵa ádil bolýy kerek edi. Meniń oıymsha, NATO-ǵa múshe bolý – Ýkraına lıderleriniń ıadrolyq arsenaldyń ornyna alýy tıis eń az nárse boldy. Al biz ne aldyq? Esh nárse. Bul ádiletsiz oıyn jáne úlken qatelik boldy», - dedi Zelenskıı podkastta.

Onyń sózine qaraǵanda, Býdapesht memorandýmyna qol qoıǵan basqa elder Ýkraınadan ıadrolyq qarýdan bas tartýdy suraǵandyqtan, oǵan «qaýipsizdik qalqanyn» usynýy kerek bolǵan.

«Barlyǵy aldaý boldy»

«Aqyr sońynda, munyń bári aldaý boldy. Bizdiń ıadrolyq qarýymyzdyń eleýli bóligi Reseıge berildi. Mysaly, Reseı qazir bul soǵysta qoldanyp jatqan strategıalyq ushaqtar», - dep atap ótti prezıdent.

Buǵan deıin de Zelenskıı Ýkraınanyń ıadrolyq qarýdan bas tartýyn synǵa alǵan bolatyn. 2025 jyldyń qańtarynda ýkraındyq kóshbasshy ıtalándyq Il Foglio gazetine bergen suhbatynda eldiń burynǵy bıliginiń ıadrolyq arsenaldan bas tartýyn «aqymaqtyq jáne jaýapsyzdyq» dep ataǵan edi.

Kelesi jyldyń aqpanynda brıtandyq jýrnalıs Pırs Morganǵa bergen suhbatynda ol Ýkraınaǵa qaýipsizdiktiń jetkilikti kepili retinde Batys seriktesteriniń ıadrolyq qarýdy berýi bola alatynyn aıtty. Onyń pikirinshe, bul Ýkraına NATO-ǵa qabyldanbasa da, Reseıdiń jańa shabýylyna jol bermeýge múmkindik berer edi.