InfoHub Logo

باتىس قازاقستان وبلىسىندا بيىل 10 مىڭ تۇرعىن «قازتەست» سىناعىنان وتپەك.

بۇل تۋرالى ورتالىق كوممۋنيكاسيالار قىزمەتى وڭىرلىك فيليالىندا وبلىستىق تىلدەردى دامىتۋ باسقارماسىنىڭ باسشىسى ماحامبەت يحسانعالي ءمالىم ەتتى.

ونىڭ ايتۋىنشا، ق ر ءبىلىم جانە عىلىم مينيسترلىگىنە قاراستى ۇلتتىق تەست ورتالىعىنىڭ ماقۇلداۋىمەن وبلىستىق تىلدەردى دامىتۋ باسقارماسى ۇيىمداستىرىپ كەلە جاتقان «قازتەستىڭ» الداعى سىناقتارى ءساۋىر، ماۋسىم جانە جەلتوقسان ايلارىنا جوسپارلانعان. ءقازىردىڭ وزىندە 3 مىڭعا جۋىق ادامنان تەست تاپسىرۋعا ءوتىنىش تۇسكەن. تىلدەردى قولدانۋ مەن دامىتۋدىڭ 2011-2020 جىلدارعا ارنالعان مەملەكەتتىك باعدارلاماسىندا بەلگىلەنگەنىندەي، 2020 جىلى وبلىس تۇرعىندارىنىڭ «قازتەستپەن» قامتىلۋىن 90 پايىزعا جەتكىزۋ كوزدەلۋدە.

وڭىردە اتالمىش سىناق 2013 جىلى باستالعان بولاتىن. سول جىلى - 2002، 2014 جىلى - 1500، 2015 جىلى - 2200، 2016 جىلى 2063 ادام «قازتەستكە» قاتىسسا، بيىلعى اقپان ايىنىڭ 20-28ء-ى ارالىعىندا ورال قالاسى مەن ءبورلى، تەرەكتى، شىڭعىرلاۋ اۋداندارىندا 2079 ادام ءوز باقتارىن سىنادى.

ايتا كەتەيىك، قازىرگى تاڭدا اۋماقتى دامىتۋ باعدارلاماسىنداعى ماقساتتى ينديكاتورلىق كورسەتكىشكە سايكەس وبلىس تۇرعىندارىنىڭ 75 پايىزى مەملەكەتتىك ءتىلدى جەتىك مەڭگەرگەن. ولاردىڭ قاتارىن 2020 جىلعا قاراي 95 پايىزعا جەتكىزۋ ماقساتىندا جوسپارلى جۇمىستار جىل سايىن اتقارىلىپ كەلەدى. مىسالى، مەملەكەتتىك ءتىلدى وقىتۋ كۋرسىمەن 2014 جىلى - 850، 2015 جىلى 805 ادام قامتىلدى. ولاردىڭ 150ء-ى - مەملەكەتتىك قىزمەتشىلەر. 2016 جىلى 665 ادام كۋرستان وتكەن بولسا، بيىل 670 ادامدى وقىتۋ جوسپارلانىپ وتىر. 

---