21ء-شى عاسىر قىزىنىڭ مۇڭى نە؟
قىز بالاسى-ەگەمەن ەلىمىزدىڭ، جانعا شيپا، دەرتكە داۋا سايىن دالامىزدىڭ قۇندى قازىناسى ىسپەتتەس.جان دۇنيەسىنىڭ اسەمدىگى جايىندا سىر شەرتەتىن قاراقات كوزى، قولاڭ شاشى، كەسكىن-كەلبەتى، سىڭعىرلاعان ءارى ۇنامدى ءۇنى، اقىل-ويىنىڭ تەرەڭدىگىن ايقىنداي تۇسەتىن ادامگەرشىلىك قاسيەتتەرىمەن دارالاناتىن نازىك جاندىلاردىڭ كىندىك قانى تامعان جەرى ءۇشىن ءاردايىم "قىلىقتى ارۋ" بولىپ قالاتىنى حاق.سودان بولار، دانا حالقىمىزدا:"قىز-ەلدىڭ كوركى" دەگەن استارلى ءسوزدىڭ بەلەڭ الۋى.
كۇللى الەم جاراتىلعاننان باستاپ، ءومىر اتتى ۇزاق ساپاردا سان قيلى اۋىرتپالىقتارعا كەزدەسىپ، ساناسىنىڭ تەرەڭدىگىنە بويلاپ، تابيعاتىنان بەرىلگەن بار جىگەرىن جيىپ، كۇرمەۋى شەشىلمەس كۇرەستەردى جەڭگەن كەيبىر وجەت قىزدارىمىزدىڭ كورگەن قورلىقتارىن كوز الدىڭىزعا ەلەستەتسەڭىز-جانىڭىز تۇرشىگەدى.ارينە، ءقازىر عۇمىرىمىزعا جاڭا لەپ پەن جاڭا تىنىس سىيلايتىن زامان، باسەكەلەستىك عاسىرى.الايدا، شىنايى باقىتقا كەنەلە الماعان كەيبىر قارا كوزدىلەرىمىزدىڭ باستان كەشكەن وقيعالارىن تىلگە تيەك ەتكەنىمىز ءجون بولار.
جاقىندا قوعامىمىزدا جاعاۇستاتارلىق جايتتار ورىن الدى.جۇردەك پويىز ارقىلى دىتتەگەن جەرىنە جەتپەك بولعان قازاقستان ازاماتشىسىنا جولسەرىكتەر ءتۇرلى قوقان-لوقى كورسەتە وتىرىپ، ازاپتاعان.ءتانى عانا ەمەس، جانى جارالانعان جابىرلەنۋشى قانداستارىنان جازانى كۇشەيتۋدى ءارى وزگەلەردەن قىز ءومىرىن وكىنىشكە تولتىرار ءدال وسىنداي قىلمىستاردىڭ قايتالانباۋىن ءوتىنىپ وتىر.بۇل-باقىتسىزدىققا دۋشار بولعان بويجەتكەننىڭ اششى زارى عانا.ال، مۇنداي ماشاقاتپەن كۇرەسە الماي، قاپىدا قالعان تالاي قازاق قىزدارىنىڭ تاعدىرى جايلى نە دەمەكپىز؟! كۇيزەلىسكە ءتۇسىپ، بار دارمەنىمەن باسقا تۇسكەن قيىنشىلىقتارمەن كۇرەس جۇرگىزسە دە، ءوز ورتاسىندا كەۋدەسىن تىك كوتەرىپ، باياندى عۇمىر كەشە الا ما؟ ءسىرا،تۋىنداعان تولاسسىز سۇراقتاردىڭ شەشىمىن تابا الماسپىز.
وسىدان بىرنەشە اي بۇرىن الەۋمەتتىك جەلىدەن 9-10 جاستار شاماسىنداعى بەيكۇنا پەرىشتەنىڭ ءدال وسىنداي حالگە دۋشار بولعانىن كوردىم.اق پەن قارانىڭ نە ەكەنىن بىلمەيتىن، مىنا الەمنەن مەيىرىم كۇتكەن بالاپانعا جاسالىنعان ايۋاندىقتان حاباردار بولعاننان كەيىن بايىز تاپپادىم.ەگەر الگى قىلمىستىڭ بەتى اشىلماسا، تاسجۇرەك اكە ويىنداعىسىن ودان ءارى جۇزەگە اسىرىپ، ءبۇلدىرشىننىڭ ارىن اياق استى ەتۋدى دوعارماس تا ەدى.مىنا جارىق دۇنيەگە ەندى عانا داعدىلانىپ كەلە جاتقان بوبەك جۇرەكتى بالعىن بالالىق شاعىنان ايىردى.
ورتاشا ەسەپ بويىنشا ، وڭىرلەردە سان مىڭداعان جاستار وسىنداي قورلىق كورەتىنى انىقتالدى.ال باسقا دا قىلمىستاردىڭ بەتپەردەسىنىڭ اشىلماعانى قانشاما؟! قىلمىستىق ىستەردى جۇدىرىقتاي جۇمىلىپ، قۇرىققا تۇسىرەيىك دەپ انت-سۋ ىشەمىز.ارەكەتكە كەلەر بولساق، ماردىمدى جۇمىسپەن اينالىسىپ جاتقانىمىز شامالى...
كوپتەگەن كورىكتىلەرىمىز نەشە ءتۇرلى سىناقتاردى وتكەرىپ، الاياقتارعا الدانعاندارىن العا تارتادى.ءيا، سەنىمگە سىزات ءتۇسىرىپ، قىز بالاسىنىڭ قاسىقتاپ جيعان ابىرويىن شەلەكتەپ توگەتىن ەكىجۇزدى ازاماتتارىمىزدىڭ كوبەيۋى-كوڭىلدى قۇلازىتادى.شىنايى شاتتىققا بولەنۋدى قالايتىن ارۋلارىمىزدى قاراڭعى تۇنەككە تىعىپ، مۇڭ مەن شەردىڭ ءدامىن تاتقىزعان ەسىل ەرلەردىڭ ارەكەتتەرىنە نە دەپ جاق اشاتىنىمدى بىلمەيمىن.وپاسىزدىق پەن ساتقىندىقتىڭ سەرگەلدەڭىنە ءتۇسىپ، وسى جولدا اداسىپ، جول تابا الماي، ساناۋلى عۇمىرىنىڭ جارتى جىلىن وتكىزگەن جاننىڭ ەرتەڭگى كۇنى نە بولماق؟ بارشامىزدىڭ وزەگىمىزدى ورتەيتىن وسى ءبىر وكىنىشتى ءتۇپ تامىرىمەن جويۋدىڭ جولىن ىزدەستىرىپ باعۋدامىز.وسى ماسەلەلەردى تۋىنداتپاس ءۇشىن رۋحانيلىقتىڭ باستاۋ بۇلاعى بولعان ۇلتتىق قۇندىلىقتارىمىزدى دارىپتەپ، قازاقي ءتالىمدى وياتىپ، اق كوڭىلمەن ءارى ادال نيەتپەن بارشا الەمنىڭ كىلتىن ۇستاۋعا تىرىسۋىمىز كەرەك-تى.ءاربىر ارۋ ءوز مۇددەسى ءۇشىن كۇرەسۋگە مىندەتتى.مەملەكەتىمىزدەگى شيەلەنىسكەن وسى ءبىر احۋالداردىڭ شەشىمىن تاۋىپ، قيىندىققا قاسقايىپ قارسى تۇرساق-ۇپايىمىزدىڭ تۇگەلدەنىپ، اسىعىمىزدىڭ الشىسىنان تۇسكەنى.نازىك جاندىلاردىڭ رۋحىن كوتەرىپ، مۇڭىن مۇڭداپ، التىنعا دا ايىرباستامايتىن ارىن ساقتاساق-الاش ەلىنە ايبىنى اسقاق كەلەشەك ۇرپاقتىڭ جەرىمىزدى كوركەيتىپ، ەلدىگىمىزدى نىق ۇستايتىنى انىق.
ارۋجان ساميدين
You Might Also Like
-
قارا ءجۇسىپتىڭ ءبىر اۋقاتتى، ءوز الدىنا مەشىت ۇستاعان جاقىن اعايىنى قايتىس بولادى. قىرقى وتكەنشە بولسىن دەپ، تۋىستارى توعىز مولدانى بىردەي الىپ قالسا كەرەك. مولدالاردى كۇتۋ قامى قارا جۇسىپكە تاپسىرىلادى.
-
تۇڭعىش پرەزيدەنت كۇنى 2011 جىلدىڭ 10 جەلتوقسانىندا پارلامەنت سەناتىنىڭ تولىق وتىرىسىندا قول قويىلىپ، بۇكىل ەلدەن قولداۋ تابا بىلگەن مەرەكە.
