InfoHub Logo

زاماناۋي ساندىق تەحنولوگيالاردىڭ دامىعانى سونشا، بۇرىندارى مۇنداي مۇمكىندىكتەر جايلى بۇرىنعىلار فانتاستيكالىق وقيعالار عانا جازاتىن. مۇنداي زاتتاردى كۇندەلىكتى قاراپايىم قۇبىلىس دەپ ساناعانىمىزبەن، بۇلار ۇزاق، قاجىرلى زەرتتەۋلەر مەن تاجىريبەلەردىڭ جەمىسى. بۇل وزىق تەحنولوگيانى ءتۇسىندىرۋدىڭ قاراپايىم مىسالى: سىزگە اجەڭىزدەن ەرەكشە قوبديشا مۇراگەرلىككە قالدى، ءبىراق ونى ابايسىزدا سىندىرىپ الدىڭىز دەلىك. 

تۋرا مۇنداي قوبديشانى ساتىپ الۋ مۇمكىن ەمەس، ءبىراق سۇيىكتى زاتىڭىزبەن قوشتاسقىڭىز دا كەلمەيدى. الايدا، سوعان ۇقساس قاڭقا ساتىپ الىپ جانە ۇيىڭىزدە 3d پرينتەر بولسا، كىشكەنە كۇش سالىپ سۇيىكتى بۇيىمىڭىزدى قايتا قالپىنا كەلتىرە الاسىز. بۇعان ۇشولشەمدى باسىپ شىعارۋ ارقىلى قول جەتكىزۋگە بولادى. ۇشولشەمدى باسىپ شىعارۋ تەحنولوگياسى كۇندەلىكتى ومىرىمىزگە قارقىندى ەنىپ، اجىراماس بولىگىنە اينالىپ كەلەدى. كەيبىر ادامدار ءۇشىن بۇل قوسىمشا تابىس كوزى نەمەسە شىعارماشىلىق يدەيالارىن ىسكە اسىرۋعا تاماشا مۇمكىندىك بولىپ وتىر. 

 

3d پرينتەر دەگەنىمىز نە؟
بۇل - سۋرەتتى ۇشولشەمدى ەتىپ شىعاراتىن قۇرىلعى. ول ساندىق ۇشولشەمدى مودەلدى پايدالانا وتىرا قاباتتاپ شىعارادى. سۋرەتتى جاساپ شىعارۋعا پلاستيكتىڭ بىرنەشە ءتۇرى نەگىز بولادى، الايدا بۇگىندە وندىرۋشىلەر بەينەنىڭ الدەقايدا شىنايى بولۋىنا جاڭا كومپونەنتتەر قوسىپ جاتىر. 

سىرت كەلبەتى جاعىنان 3d پرينتەر مەتالل باعىتتاۋشىلار قوندىرىلعان قاراپايىم پرينتەرگە ۇقساس، ال باسىپ شىعارۋدى ەكسترۋدەر نەمەسە لازەر جاسايدى. ونى كۇردەلى سۋرەتتەر مەن پىشىندەردى، بولشەكتەر مەن فراگمەنتتەردى، جالپى قاراپايىم پرينتەرمەن شىعارۋعا مۇمكىن ەمەس زاتتاردى باسىپ شىعارۋعا قولدانادى. 

باسىپ شىعارۋدىڭ قانداي تەحنولوگياسى قولدانىلادى؟
ۇشولشەمدى باسىپ شىعارۋ جايلى العاشقى يدەيالار سوناۋ 80ء-شى جىلدارى پايدا بولعان. ءدال سول ۋاقىتتارى ارنايى فوتوپوليمەرل پلاستيكتىڭ كومەگىمەن نىسانالار قۇراستىراتىن ستەرەوليتوگراف جاسالىپ شىعارىلعان. تەحنولوگيا فوتوپوليمەرلەردىڭ قاسيەتى نەگىزىندە جاسالعان – لازەردىڭ اسەرىنەن ول قاتىپ قالىپ، پلاستيكتىڭ قاتتى پىشىنىنە اينالادى. ءدال وسى قاسيەتتەر بولاشاق پريينتەرگە نەگىز بولدى: لازەر ساۋلە ارقىلى سۋرەتتىڭ ءاربىر پيكسەلىن سۇيىق زاتتەكتەن جاساپ سالادى، ول قاتقان كەزدە نىسانانىڭ قاتتى بولشەگىنە اينالادى. 

تاعى ءبىر قولدانىلاتىن تەحنولوگيا «لازەرلىك بىرىكتىرۋ» دەپ اتالادى. قولدانىلاتىن ماتەريال – تەز بالقيتىن پلاستيكتىڭ ۇنتاعى. لازەردىڭ اسەرىنەن پلاستيك بالقىپ، يىلگىش بولادى، ال كەيىن ءبىر قوسپاعا بىرىگەدى. پلاستيك لازەردىڭ تەمپەراتۋراسىنان تۇتانىپ نەمەسە قىشقىلدانىپ كەتپەس ءۇشىن جۇمىس جاسالىپ جاتقان كامەراعا ازوت جىبەرەدى (وقشاۋ گاز). 

 

3d پرينتەردىڭ جۇمىسى بىلاي ىسكە اسادى: قىزمەتشى ەلەمەنت – ەكسترۋدەر-باس پرينتەردى ىسكە قوساتىن پلاستيك ءجىپتى بالقىتادى. كەيىن بالقىتىلعان ەلەمەنت شۇمەك ارقىلى بەرىلەدى، ال كەيىن بولمە تەمپەراتۋراسىندا تەز قاتادى. 
جۇمىس ىستەۋ ءۇشىن باسقا وندىرىستىك تەحنولوگيالار سياقتى ارنايى جاعدايدى قاجەت ەتپەيدى. وعان قوسا نىسانالاردى جاساۋعا كەتەتىن شىعىن دا اسا كوپ ەمەس – 1 كگ پلاستيك ءۇشىن بار-جوعى 50-60 دوللار. سونىمەن قاتار نىسانا ۇزاق ۋاقىتقا ساقتالادى، بۇل پرينتەردى ءۇي جاعدايىندا پايدالانۋدىڭ قۇندىلىعىن ارتتىرادى. 

 

 

 

 

3d پرينتەر ۇسىناتىن مۇمكىندىكتەر
وزىق تەحنولوگيا ارقىلى، بۇگىندە ۇشولشەمدى سۋرەتى بار قاراپايىم فۋتبولكالار جاساپ قانا قويماي، عيماراتتاردىڭ كۇردەلى ۇشولشەمدى پروەكسيالىق مودەلدەرىن 100 ميكرونعا دەيىنگى ناقتىلىقپەن قۇراستىرۋعا بولادى. بۇل اسىرەسە عىلىمي ينستيتۋتتارعا وزەكتى، ويتكەنى ءتۇپتۇلعاسىن جاساپ قانا قويماي، جاسالىپ جاتقان زەرتتەۋلەردە ونى ۇستاپ كورۋگە دە بولادى. بۇل جاڭالىققا زەرگەرلەر دە قۋاندى – جاڭا زامان پرينتەرىنىڭ ارقاسىندا ەڭ كۇردەلى دەگەن زاتتارعا قۇيما پىشىندەرىن جاساۋ وڭاي بولاتىن بولدى. ال ارحەولوگتارعا تابىلعان ەلەمەنتتىڭ قيسىندى جوباسىن سالىپ قانا قويماي، ونىڭ ناقتى ءتۇرىن قۇراستىرۋعا مۇمكىندىك تۋدى. 
عالىمدارعا ارمان بولعان «ازىق-تۇلىك پرينتەرى» كوپ ۇزاماي شىندىققا اينالۋى مۇمكىن. ول اقۋىزدار مەن كومىرسۋلاردان ناعىز ازىق-تۇلىكتى جاساي الادى دەپ كۇتىلۋدە. سونىمەن قاتار، وزىق تەحنولوگيا ادام مۇشەلەرىن جاساۋعا كومەكتەسۋى مۇمكىن. بۇل اسىرەسە دونور تاپشىلىعىنا ۇشىراعان ادامدارعا وزەكتى. ءقازىردىڭ وزىندە ومىرتقاارالىق ديسكتەر مەن باعانالىق جاسۋشالاردى باسىپ شىعارۋ تاجىريبەگە ەنىپ جاتىر. سول سەبەپتى، بۇرىنعىلار فانتاستيكا دەپ ويلاعان، ال ءبىز قازىردە كەيبىر كينولاردان كورىپ جۇرگەن تاڭعالارلىق زاتتار كوپ ۇزاماي شىندىققا اينالىپ، ءومىرىمىزدى الدەقايدا جەڭىلدەتۋى مۇمكىن. 

 

 

 

---