InfoHub Logo

7 تامىز – يادرولىق قارۋعا تىيىم سالۋ كۇنى. بۇل كۇن ادامزات تاريحىنداعى ەڭ قاسىرەتتى ساتتەردىڭ ءبىرى – 1945 جىلى حيروسيما قالاسىنا اتوم بومباسىنىڭ تاستالۋىمەن تىعىز بايلانىستى. سول كۇنى تاڭعى 8:15-تە اقش-تىڭ B-29 Enola Gay بومبالاۋشى ۇشاعى «Little Boy» (قازاقشا – «بالا») اتتى يادرولىق قارۋدى تاستادى. ناتيجەسىندە 140 مىڭنان استام ادام قازا تاۋىپ، مىڭداعانى ءىز-تۇزسىز جوعالدى. قالا كۇل-تالقان بولىپ، تىرشىلىك اتاۋلىنى جالماعان الاپات جارىلىس ادامزات ءۇشىن بۇرىن-سوڭدى بولماعان اپاتتىڭ شىندىعىن اشتى.

سودان بەرى جىل سايىن ءدال وسى ساعاتتا جاپون حالقى ۇنسىزدىكپەن قۇربان بولعانداردى ەسكە الادى. ۇنسىزدىك – بۇل قارسىلىقتىڭ ءۇنسىز ءۇنى، قايعىنىڭ ماڭگىلىك بەلگىسى.

اتوم قاسىرەتى تەك جاپونيامەن شەكتەلگەن جوق. 1949 جىلى 29 تامىزدا سەمەي دالاسىندا العاشقى يادرولىق سىناق جۇرگىزىلدى. 40 جىل بويى قازاق دالاسى پوليگونعا اينالىپ، 456 يادرولىق جارىلىس جاسالدى. ونىڭ 116-سى جەر ۇستىندە، اۋەدە ءوتتى. ميلليونداعان گەكتار جەر ۋلاندى، مىڭداعان وتباسى ساۋلە زاردابىن تارتتى.

يادرولىق قارۋدىڭ زاردابىن كوزىمەن كورگەن، دەنەسىمەن سەزىنگەن حالىق رەتىندە قازاقستان بەيبىت باستامالارىمەن الەمگە ۇلگى بولىپ كەلەدى. ەل تاريحى يادرولىق سىناقتاردىڭ تەك عىلىمي تاجىريبە ەمەس، ادام ومىرىنە تونگەن تىكەلەي ءقاۋىپ ەكەنىن كورسەتتى.

بۇل كۇن – ەسكە الۋ عانا ەمەس، ەسكەرتۋ. يادرولىق اپات ەشقاشان قايتالانباۋى ءتيىس.