InfoHub Logo

اباي وبلىسىنىڭ اكىمى بەرىك ءۋالي جۇمىس ساپارىمەن ءۇرجار اۋدانىنا بارىپ، الەۋمەتتىك-ەكونوميكالىق دامۋ بارىسىمەن جانە شەشىمىن كۇتكەن ماسەلەلەرمەن تانىستى.

الەۋمەتتىك-ەكونوميكالىق دامۋ جانە جوسپارلار

الدىمەن وبلىس اكىمى اۋدان تۇرعىندارىمەن كەزدەسىپ، ەسەپ بەردى. جيىندا اۋىل شارۋاشىلىعى، ينۆەستيسيا، ينفراقۇرىلىم، ءبىلىم بەرۋ، دەنساۋلىق ساقتاۋ، مادەنيەت پەن سپورت سالالارىنداعى جوبالار ءسوز بولدى.

ءۇرجار اۋدانى اۋىل شارۋاشىلىعى القاپتارىنىڭ كولەمى بويىنشا وبلىستا ەكىنشى ورىندا. بيىل 113 مىڭ گەكتار ەگىستىك يگەرىلىپ، شارۋالارعا 1،9 ملرد تەڭگە نەسيە بەرىلدى. سونىمەن قاتار، 7،8 ملرد تەڭگەگە 9 ينۆەستيسيالىق جوبا جۇزەگە اسىرىلۋدا.

اۋىز سۋمەن قامتۋ باعىتىندا اۋدانداعى 5 اۋىلعا سۋ تارتىلىپ جاتىر. قىزىلتۋ اۋىلىنداعى سۋ جۇيەسى اياقتالۋعا جاقىن، جۇمىس تولىق بىتكەن سوڭ 582 تۇرعىن تازا اۋىز سۋمەن قامتىلادى. جالپى اۋدان حالقى كەزەڭ-كەزەڭىمەن 100 پايىز ساپالى اۋىز سۋمەن قامتىلماق.

بيىل وبلىستا 358 شاقىرىم جول جوندەلسە، ونىڭ ىشىندە جوعارعى ەگىنسۋ، جاناي، اقجار، جاڭا تىلەك، قاراقول اۋىلدارىنىڭ كوشەلەرى ورتاشا جوندەۋدەن ءوتتى. اقجار اۋىلىندا 3،9 شاقىرىم جول جوندەلىپ، ساپاسى تەكسەرىلدى.

ءبىلىم بەرۋ سالاسىندا ءۇرجارداعى اباي اتىنداعى مەكتەپ-بالاباقشا مەن باۋىرجان مومىش ۇلى اتىنداعى مەكتەپكە كۇردەلى جوندەۋ جاسالۋدا. جەتى مەكتەپكە پاندىك كابينەتتەر ورناتىلىپ، 425 جاڭا پارتا مەن اسحانا جابدىقتارى الىندى.

مادەنيەت جانە سپورت سالاسىندا جوعارعى ەگىنسۋ اۋىلىندا 100 ورىندىق كلۋب سالىندى، ءۇرجاردا مادەنيەت ءۇيىنىڭ جوباسى دايىندالۋدا. اۋداندىق اۋرۋحاناعا جاڭا مەديسينالىق جابدىقتار الىنىپ، جىل سوڭىنا دەيىن كۇندىزگى ستاسيونارى بار امبۋلاتوريا پايدالانۋعا بەرىلمەك.

تۇرعىنداردىڭ وتىنىشتەرى

كەزدەسۋ سوڭىندا اۋىل تۇرعىندارى مادەنيەت ءۇيى، سپورت كەشەنى، بالاباقشا، مەديسينا قىزمەتكەرلەرىنە جاتاقحانا، جول جانە اۋىز سۋ ماسەلەلەرىن كوتەردى. بەرىك ءۋالي بارلىق ۇسىنىستار كەزەڭ-كەزەڭىمەن شەشىلەتىنىن ايتتى.

«ءۇرجار – شەجىرەلى تاريحى مەن ەڭبەكقور حالقى بار قاسيەتتى مەكەن. مۇنداعى ماسەلەلەردى بىلەمىن، رەت-رەتىمەن شەشىلەتىن بولادى»، – دەدى وبلىس اكىمى.

جەكە قابىلداۋ

وبلىس اكىمى تۇرعىنداردى جەكە ماسەلەلەرى بويىنشا دا قابىلدادى. كوتەرىلگەن تۇيتكىلدەر قاتارىندا دەنساۋلىق ساقتاۋ، دارى-دارمەكپەن قامتۋ، الەۋمەتتىك كومەك، تۇرعىن ءۇي مەن ينفراقۇرىلىم جايى بولدى. اكىم ءاربىر ءوتىنىش نازاردان تىس قالمايتىنىن، ءتيىستى باسقارمالارعا تاپسىرما بەرىلگەنىن جەتكىزدى.

ارنايى الەۋمەتتىك ورتالىق

بەرىك ءۋالي «ءۇرجار بالالارعا ارنالعان ارنايى الەۋمەتتىك قىزمەت كورسەتۋ ورتالىعىنا» باردى. مۇندا 56 بالاعا الەۋمەتتىك قىزمەت كورسەتىلەدى. قازىرگى ۋاقىتتا ورتالىق جانىنان قوسىمشا عيمارات سالىنىپ جاتىر. نىسان ىسكە قوسىلعان سوڭ قامتىلاتىن بالالار سانى 70-كە جەتپەك.

ايماق باسشىسى مەردىگەرگە قۇرىلىس قارقىنىن ارتتىرىپ، جۇمىستى ساپالى اياقتاۋدى تاپسىردى.